Innlent | mbl | 29.5.2008 | 13:57

Óskar Bergsson vill að ákvörðun um Bitruvirkjun verði endurskoðuð

Af Hengilsvæðinu þar sem til stóð að byggja Bitruvirkjun Af vefnum hengill.nu

Borgarfulltrúi Framsóknarflokksins, Óskar Bergsson, lagði fram tillögu á fundi borgarráðs um að borgarráð beindi því til stjórnar Orkuveitu Reykjavíkur að endurskoða ákvörðun sína um að hætta við Bitruvirkjun. Tillögunni var frestað.

Tillaga Óskars Bergssonar:

„Ákvörðun stjórnar Orkuveitu Reykjavíkur frá 20. maí s.l. þar sem ákveðið var að hætta undirbúningi Bitruvirkjunar og fresta öllum frekari framkvæmdum á svæðinu hefur sætt harðri gagnrýni. Margir hafa orðið til þess að velta fyrir sér réttmæti ákvörðunarinnar sem tekin var innan sólarhrings frá því að álit Skipulagsstofnunar var kynnt.

Í yfirlýsingu frá Samorku er því haldið fram að Skipulagsstofnun hafi farið út fyrir lögbundið hlutverk sitt, samkvæmt lögum um mat á umhverfisáhrifum. Skipulagsstofnun hefur brugðist við þeirri yfirlýsingu með því að staðfesta að það sé ekki hlutverk stofnunarinnar að leggjast gegn eða hafna byggingu Bitruvirkjunar.

Í ljósi þess að álit Skipulagsstofnunar var ekki bindandi, harðra viðbragða hagsmunaaðila, mikils áfallins kostnaðar og nýrrar hagskýrslu ASÍ um verulegan samdrátt framundan í íslensku efnahags- og atvinnulífi, samþykkir borgarráð að beina því til stjórnar Orkuveitu Reykjavíkur að endurskoða ákvörðun sína frá 20. maí. Það eru eindregin tilmæli borgarráðs Reykjavíkur að stjórn fyrirtækisins endurskoði fyrri afstöðu sína í ljósi þeirra upplýsinga sem fram hafa komið eftir að ákvörðun var tekin."