Olían úr Alexander Hamilton?

Starfsmenn Landhelgisgæslunnar telja líklegast að olíubrák sem nýja flugvél Landhelgisgæslunnar fann á dögunum á Faxaflóa komi frá bandaríska varðskipinu Alexander Hamilton, en þýskur kafbátur sökkti skipinu 1942.

Starfsmenn Gæslunnar hafa aflað upplýsinga um skipin sem talin eru koma til greina sem skipsflök á botni Faxaflóa. Skipin eru bandaríska varðskipið Alexander Hamilton sem varð fyrir árás þýska kafbátsins U-132 þann 29. janúar árið 1942 og olíuskipið Shirvan varð fyrir árás þýska kafbátsins U-300 þann 10. nóvember 1944. Grunur um skipsflak vaknaði eftir að eftirlitsflugvél Landhelgisgæslunnar TF-Sif flaug yfir svæðið þann 7. júlí sl. og greindi olíubrák með radar flugvélarinnar sem m.a. er notaður við mengunareftirlit.

Í frétt á heimasíðu Landhelgisgæslunnar segir að olíuskipið Shirvan hafi verið  nær þrisvar sinnum stærra en Alexander Hamilton eða 6.017 tonn. Alexander Hamilton var 2.216 tonn. Veður hafði að sjálfsögðu áhrif á hvert skipin ráku eftir árásirnar en þegar veðurlýsingar eru skoðaðar er talið líklegra að flakið sé Alexander Hamilton því suðaustan átt var á svæðinu þegar Shirvan sökk og er því talið að flakið liggi vestar í Faxaflóa.

Um málið eru þó skiptar skoðanir og ekki verður mögulegt að leiðrétta villur eða misskilning fyrr en skoðun með neðansjávarmyndavél staðfestir hvort flakið sé um að ræða.

• 1 blogg um fréttina

Bloggað um fréttina

• Níels A. Ársælsson.: Upplýsingar um Alexander Hamilton