Banaslys í Ingólfsfjalli

Lögreglunni á Selfossi barst tilkynning klukkan 15:34 í dag um að maður í sviffallhlíf hafi skollið utan í hamravegg vestan í Ingólfsfjalli á móts við Hvammsveg í Nýbýlahverfi nánar tiltekið á milli Arnarnípu og Hólsstaðagils.  Lögregla, sjúkralið og björgunarsveitir frá Selfossi og Hveragerði fóru þegar á staðinn. 

Fallhlífarmaðurinn lenti ofarlega í fjallinu og björgunarsveitarmenn fóru á staðinn með sértækan búnað.  Maðurinn var ekki með lífsmarki þegar björgunarmenn komu að honum. 

Samkvæmt upplýsingum frá lögreglunni á Selfossi var félagi mannsins vitni að slysinu og tilkynnti strax til Neyðarlínu. Maðurinn mun hafa lagt upp af fjallinu í sviffallhlífinni en hægur vindur af norðvestri borið hann að hamrabeltinu með þessum hörmulegum afleiðingum. Hinn látni er af erlendu bergi brotinn og var búsettur á höfuðborgarsvæðinu en nafn hans er ekki hægt að gefa upp á þessari stundu. 

Það óhapp varð á meðan björgunaraðgerðir stóðu yfir að eldur kviknaði í sinu við fjallið og mikinn reyk lagði yfir svæðið sem björgunarmenn voru á sem var til mikilla óþæginda.  Eldurinn kviknaði út frá heitu pústkerfi bíls félaga fallhlífarmannsins sem hafði hraðað sér að staðnum eftir að hann sá félaga sinn lenda á fjallinu.  Slökkvilið frá Brunavörnum Árnessýslu og Slökkviliði Hveragerðis sáu um slökkvistarf. 

Lögreglan á Selfossi fer með rannsókn málsins og við frumrannsókn var leitað Rannsóknarnefndar flugslysa en slys af þessu tagi heyrir þó ekki undir nefndina.