Vekur spurningar um stjórnarsamstarfið

„Ákvörðun innanríkisráðherra í morgun vekur óhjákvæmilega spurningar um ríkisstjórnarsamstarf Samfylkingar og Vinstri grænna.“ Þetta segir Árni Páll Árnason, efnahags- og viðskiptaráðherra.

Árni Páll fjallar á heimasíðu sinni um ákvörðun Ögmundar Jónassonar að hafna umsókn Huang Nubo um  að kaupa Grímsstaði á Fjöllum.

„VG virðist finnast það sjálfsagt mál að skrifa upp á stjórnarsáttmála og stefnumörkun um mikilvægi erlendrar fjárfestingar, en mæta svo öllum erlendum fjárfestingaráformum með tortryggni og með því að gera einstökum fjárfestum ávallt upp annarleg sjónarmið. Öllu virðist tjaldað til og tilgangurinn helga meðalið: Í fyrra sætti Magma fordæmingu fyrir að hafa stofnað skúffufyrirtæki um fjárfestingu á Íslandi en í dag er höfuðrökstuðningur fyrir synjun innanríkisráðherra sá að félag í eigu Nubo sé ekki skráð á Evrópska efnahagssvæðinu. Skilaboðin til erlendra fjárfesta eru skýr: Öllu verður snúið á haus til að verjast erlendri fjárfestingu.

Í minnisblaði sem ég sendi innanríkisráðherra var ítarlega rakið hversu mikilvæg erlend fjárfesting væri fyrir íslenskt efnahagslíf. Þjóðin er ung og þarf erlent fé. Undanfarna áratugi höfum við byggt alfarið á lánsfé, með hörmulegum afleiðingum. Hrunið hefur kennt okkur að velsæld verður ekki byggð á lánsfé. Þess vegna er erlend fjárfesting nauðsynleg, óháð því hvort Nubo kemur eða fer,“ segir Árni Páll.

Ráðherrann segir að staða efnahagsmála sé sérstaklega viðkvæm nú, þar sem boginn var spenntur til hins ýtrasta með gerð kjarasamninga á liðnu vori, þar sem samið var um kjarabætur umfram það sem efnahagslífið stendur nú undir og miklar byrðar lagðar á ríkissjóð. „Lélegur gangur í nýfjárfestingu frá gerð þeirra veldur því að allar líkur eru á að ávinningur af gerð kjarasamninganna verði lítill sem enginn og kauphækkanir brenni upp í verðbólgu að vanda. Einstök fjárfestingaráform hafa því miður oftar en ekki strandað á ríkinu.“

Pistill Árna Páls

• 9 blogg um fréttina

Bloggað um fréttina

• Gísli Foster Hjartarson: Árni Páll fyndinn!!!
• Benedikta E: Samfylkingin er ekki stjórntæk meið neinum.
• Óðinn Þórisson: Samfylkinng, Sjálfstæðisflokkur og Framsókn
• Hörður Jónasson: Samfylkingin á að slíta stjórnarsamstarfinu nú þegar.
• Rakel Sigurgeirsdóttir: Klíkubræðrasamfélaginu ógnað!
• Jón Páll Haraldsson: Leppar Vinstri Grænna
• Óli Björn Kárason: Innantómar upphrópanir og gagnrýni
• Páll Vilhjálmsson: Kínversk slit Jóhönnustjórnar
• Sigurður Jónsson: Er Samfylkingin að gefast upp á Vinstri grænum?