Þorvaldur Lúðvík til AFE

Stjórn Atvinnuþróunarfélags Eyjafjarðar (AFE) hefur ráðið Þorvald Lúðvík Sigurjónsson sem nýjan framkvæmdastjóra félagsins frá 11. janúar nk. en Magnús Ásgeirsson lét af störfum sem framkvæmdastjóri um áramótin.

Þorvaldur Lúðvík var m.a. forstjóri Sögu fjárfestingarbanka og starfaði nú síðast sem ráðgjafi um fjármögnun sprotafyrirtækja og um markaðssetningu og rekstur smárra og meðalstórra fyrirtækja.

Hann lauk prófi í alþjóðaviðskiptum og tungumálum frá Heriot-Watt háskóla í Edinborg og FH Reutlingen í Þýskalandi árið 1995.  Hann sinnti um nokkurra ára skeið kennslu við Háskólann á Akureyri meðfram öðrum störfum.  Þorvaldur er jafnframt löggiltur verðbréfamiðlari.

Í tilkynningu frá AFE segir, að vegna fyrri starfa sinna hjá Sögu fjárfestingarbanka og sem framkvæmdastjóri hjá Kaupþingi til ársins 2006 hafi Þorvaldur Lúðvík aðstoðað sérstakan saksóknara í rannsóknum embættisins á málefnum Glitnis og Kaupþings. Stjórn AFE hafi kynnt sér þau mál og þyki ekki ástæða til að efast um hæfi hans vegna þeirra rannsókna.

Stjórn AFE þakkar fráfarandi framkvæmdastjóra, Magnúsi Ásgeirssyni, gott starf fyrir félagið og óskar honum velfarnaðar í framtíðinni.

• Blogga um frétt