Stjórnvöld í Skotlandi hafa áhuga á að kynnast reynslu Íslendinga frá heimastjórn til lýðveldis og vilja efla samvinnu Skotlands og Íslands. Þetta kom fram á fundi Ólafs Ragnars Grímssonar, forseta Íslands, með Alex Salmond, forsætisráðherra Skotlands, í gær.
Ólafur Ragnar og Alex Salmond taka báðir þátt í Heimsþingi hreinnar orku sem nú er haldið í Abu Dhabi og áttu þeir fund við það tækifæri í gær. Í frétt frá skrifstofu forseta Íslands segir að á fundinum hafi komið fram ríkur vilji til að efla samvinnu landanna, bæði með tilliti til vaxandi sjálfstjórnar Skotlands og aukins mikilvægis norðurslóða.
„Nágrenni Íslands og Skotlands í Norður-Atlantshafi skapar fjölmörg tækifæri til arðbærrar samvinnu á komandi árum, t.d. í orkumálum með sæstrengjum frá Íslandi og Grænlandi til
Skotlands og í þjónustu við siglingar um norðurleiðina sem breyta mun flutningum milli Asíu, Ameríku og Evrópu,“ segir í fréttatilkynningu forsetaskrifstofunnar.
Þá hafi stjórnvöld í Skotlandi einnig áhuga á því að kynnast reynslu Íslendinga frá heimastjórn til lýðveldis, hvernig þróun efnahagslífs og þjóðfélags á undanförnum áratugum styrkti stöðu landsins á alþjóðavísu.
„Einnig var á fundinum fjallað um viðbrögð bresku ríkisstjórnarinnar í kjölfar bankahrunsins á Íslandi en forsætisráðherra Skotlands hefur gagnrýnt þau harðlega. Loks var rætt um mikilvægi sjálfbærrar nýtingar sjávarauðlinda,“ segir í fréttatilkynningunni.