Allir sakborningar í skotárásarmálinu í Bryggjuhverfinu í Reykjavík neituðu sök við þingfestingu málsins í dag. Lögreglan var með mikinn viðbúnað í dómsal en mennirnir eru taldir hafa tengsl við vélhjólasamtök.

Mennirnir, Axel Már Smith, Kristján Halldór Jensson og Tómas Pálsson Eyþórsson, eru allir ákærðir fyrir tilraun til manndráps með því að hafa að kvöldi föstudagsins 18. nóvember 2011 farið saman á bifreið, á bifreiðastæði við bifreiðasöluna Höfðahöllina að Tangarbryggju 14 í Reykjavík, þar sem þeir höfðu mælt sér mót við mann vegna ágreinings um fjárskuld.

Í ákæru segir að Kristján Halldór hafi skotið úr haglabyssu einu skoti í áttina að bíl mannsins, en ekki hæft. Þegar svo maðurinn ók á brott veittu mennirnir honum eftirför og skaut Kristján Halldór öðru skoti út um glugga bifreiðarinnar. Við skotið brotnaði afturrúða bíls fórnarlambsins og miklar skemmdir urðu á bifreiðinni.

Með þessari háttsemi eru mennirnir taldir hafa stofnað lífi og heilsu fórnarlambsins í augljósan háska.

Tveir mannanna voru fluttir í dómsal í handjárnum og fylgdu þeim sex lögreglumenn. Frekar óvanalegt er að svo mikill viðbúnaður sé við flutning sakborninga, og til merkis um að mennirnir eru taldir mjög hættulegir.

Tengdar fréttir

Skotárás í Bryggjuhverfinu

Sakborningur í skotárásarmáli fær bætur

• Dómur þyngdur yfir skotárásarmanni
• Skotárásarmaður áfrýjaði dómi
• Sýknaðir af manndrápstilraun
• Dæmdir fyrir skotárás

» Fleiri tengdar fréttir

• Blogga um frétt