Vöknuðu við sprenginguna

Sprengjunni, sem sprakk undir bíl í Kópavogi í nótt, var að öllum líkindum komið fyrir milli afturhjóla bifreiðarinnar. Skemmdir urðu á bílnum en vegfarandi sem átti leið hjá snemma í morgun segir að afturstuðari bílsins hafi verið mikið skemmdur. Þá brotnaði rúða í nærliggjandi húsi.

Bifreiðin stóð fyrir utan einbýlishús en eigandi hans býr í húsinu.

Íbúi í hverfinu sem mbl.is náði tali af segist hafa vaknað við mikinn hvell á fjórða tímanum í nótt. Viðmælendum ber þó ekki saman um nákvæma tímasetningu enda voru flestir enn hálfsofandi þegar sprengjan sprakk.

Nágrannar héldu margir að þeir hefðu vaknað við þrumuveður en þeim brá heldur betur í brún þegar þeim varð litið út í morgun því lögregla var með mikinn viðbúnað á staðnum.

Götunni var lokað fyrir allri umferð um tíma og bíllinn var fjarlægður af lögreglu um klukkan 7 í morgun og er nú til rannsóknar.

Rúða í nærliggjandi húsi brotnaði við hvellinn af sprengjunni í Kópavogi í nótt. mbl.is

• Blogga um frétt