4.739 fyrirtæki gjaldþrota frá hruni

Frá ársbyrjun 2008 hafa 4.739 fyrirtæki verið úrskurðuð gjaldþrota. Gjaldþrotin voru flest í fyrra þegar 1.578 fyrirtæki urðu gjaldþrota. Allt bendir til að gjaldþrotin verði færri í ár.

Árið 2008 urðu að meðaltali 62 fyrirtæki gjaldþrota á mánuði. Árið 2009 voru þau 75. Árið 2010 voru þau 82 og í fyrra varð 131 fyrirtæki gjaldþrota að jafnaði í mánuði eða meira en fjögur á dag. Það sem af er þessu ári hafa um 100 fyrirtæki orðið gjaldþrota á mánuði.

Gjaldþrotunum er því að fækka, en þau eru enn mjög mörg og verða líklega fleiri í ár en þau voru 2010.

Flest fyrirtæki sem hafa orðið gjaldþrota eru í byggingarstarfsemi og mannvirkjagerð. Þar á eftir kemur heild- og smásöluverslun. Mörg fyrirtæki í fjármálastarfsemi hafa orðið gjaldþrota, sem og fyrirtæki í fasteignaviðskiptum.

Þótt gjaldþrotin séu mörg eru nýskráð fyrirtæki enn fleiri. Fyrirtækjum í landinu er því ekki að fækka heldur fjölga. Fyrirtækjum í byggingageira hefur t.d. fjölgað. Ástæðan er sú að þegar fólk missir vinnu sína reynir það að skapa sér atvinnu m.a. með því að stofna eigið fyrirtæki.

• 2 blogg um fréttina

Bloggað um fréttina

• Haraldur Haraldsson: 4.739 fyrirtæki gjaldþrota frá hruni///Svo er talað um þetta hafi …
• Páll Vilhjálmsson: Gjaldþrot, hagvöxtur og heiladauð stjórnmál