Mótmælandi handtekinn

Rúmlega tvítugur karlmaður var handtekinn við  rússneska sendiráðið við Túngötu. 

Samkvæmt upplýsingum frá lögreglunni á höfuðborgarsvæðinu veittist maðurinn að lögreglumönnum sem höfðu afskipti af öðrum aðila sem virtist ætla að draga einhverja dulu upp í flaggstöng sendiráðsins.

Maðurinn er nú til yfirheyrslu hjá lögreglu. Hann verður væntanlega kærður fyrir brot á lögreglusamþykkt og fyrir að hindra lögreglumenn í starfi.

Maðurinn sem var handtekinn var að mótmæla handtökum rússneskra yfirvalda á meðlimum pönkhjómsveitarinnar Pussy Riot. Meðlimirnir, sem eru allir kvenkyns, voru handteknar vegna mótmæla við stjórn Vladimir Putins.

Boðað var til samstöðufundar fyrir utan sendiráð Rússlands í dag. Mótmælendurnir segja að brotið hafi verið á grundvallar mannréttindum kvennanna en þær hafa verið í haldi án dóms frá því í mars.

Maðurinn var handtekinn fyrir að hindra störf lögreglumanna.

• Blogga um frétt