Innlent | mbl | 4.9.2012 | 11:52 | Uppfært 6.10.2017 7:48

Illugi aftur þingflokksformaður

Ragnheiður Elín Árnadóttir og Illugi Gunnarsson. mbl.is

„Ég er afskaplega þakklátur fyrir það traust sem þingflokkurinn sýnir mér til þess að takast á við þetta verkefni og ég mun auðvitað reyna að sinna því eftir bestu getu,“ segir Illugi Gunnarsson, þingmaður Sjálfstæðisflokksins, í samtali við mbl.is en hann hefur tekið á ný við stöðu þingflokksformanns flokksins. Ragnheiður Elín Árnadóttir, sem gegnt hefur þeirri stöðu segist „vitanlega ekki ánægð með niðurstöðuna.“

Tekin var ákvörðun um það á fundi þingflokksins í Valhöll í dag samkvæmt tillögu Bjarna Benediktssonar, formanns Sjálfstæðisflokksins. „Það eru vitanlega stór verkefni framundan sem er kosningaveturinn og kosningarnar í framhaldinu og þetta mikla verkefni sem er að koma ríkisstjórninni frá,“ segir Illugi.

Illugi gegndi stöðu þingflokksformanns frá 2009-2010 en tók sér leyfi frá störfum sínum á Alþingi á meðan rannsókn stóð yfir á Sjóði 9 hjá Glitni en hann sat í stjórn sjóðsins þegar bankahrunið varð haustið 2008. Illugi tók sæti sitt aftur á þingi þegar rannsókninni lauk en Ragnheiður Elín Árnadóttir, þingmaður Sjálfstæðisflokksins, tók við sem þingflokksformaður þegar Illugi hvarf af þingi og hefur gegnt henni þar til nú.

„Ég er vitanlega ekki ánægð með þessa niðurstöðu enda hef ég auðvitað metnað til þess að vera í forystusveit Sjálfstæðisflokksins og hef verið í þessu starfi í tvö ár. Ég þarf ekki að vera ánægð með þessa ákvörðun þó ég uni auðvitað niðurstöðunni,“ segir Ragnheiður Elín í samtali við mbl.is.

Hún segist að öðru leyti ætla að halda áfram að vinna af einurð að hagsmunum Suðurkjördæmis, sem hún hafi nú meiri tíma til að gera, og tryggja Sjálfstæðisflokknum þann sigur sem hann eigi skilið í kjördæminu „og losna þannig við þá ömurlegu ríkisstjórn sem við höfum búið við.“