Innlent | mbl | 11.10.2012 | 18:50 | Uppfært 15.10.2012 13:25

Ættum að anda rólega

Kristján Möller mbl.is/Kristinn Ingvarsson

„Ég er algjörlega sammála því sem fram kom hjá forsætisráðherra í morgun, ég hef aldrei heyrt neitt um þegjandi samkomulag í þessu. Við ættum bara að anda rólega,“ segir Kristján L. Möller, formaður atvinnuveganefndar Alþingis, um þá umræðu sem verið hefur um undirbúningsframkvæmdir Landsvirkjunar í Bjarnarflagi.

Í umræðum á Alþingi fyrr í vikunni sagði Álfheiður Ingadóttir, þingmaður VG, að í gildi væri þegjandi samkomulag um að Landsvirkjun færi ekki út í virkjunarframkvæmdir í Bjarnarflagi á meðan vinna við rammaáætlun væri í gangi á Alþingi. Svandís Svavarsdóttir umhverfisráðherra hefur einnig sagt að Landsvirkjun ætti að halda að sér höndum á meðan þessi vinna færi fram á þingi.
Jóhanna Sigurðardóttir forsætisráðherra var spurð út í þessi ummæli Álfheiðar í fyrirspurnartíma í morgun og hún kannaðist ekki við neitt samkomulag af þessu tagi. Sagði Jóhanna ekki ástæðu til að amast við framkvæmdunum, þær væru í samræmi við rammaáætlun og gildandi skipulag á svæðinu.

Kristján segir ummæli Álfheiðar hafa komið sér verulega á óvart, þess vegna sé hann ánægður með afdráttarlaus svör forsætisráðherra.
„Þarna er verið að hefja vinnu við mikla atvinnuuppbyggingu, sem mun skila samfelldu hagvaxtarskeiði í tengslum við áform þeirra fyrirtækja sem vilja hefja starfsemi á Bakka. Þetta snýst um að nota þá miklu orku sem er á Norðausturlandi, alveg eins og verið er að nýta orkuna hér á höfuðborgarsvæðinu, meðal annars til atvinnuuppbyggingar,“ segir Kristján.

Fer ekki á taugum yfir því að sjá jarðýtu

Hann segir að þó að vinna við rammaáætlun hafi því miður tafist, og nauðsynlegt sé að klára hana, þá megi sú vinna ekki tefja alla uppbyggingu á virkjunarkostum eins og Bjarnarflagi, sem er í nýtingarflokki samkvæmt rammaáætlun.

„Það veitir ekki af því að vera í atvinnuuppbyggingu eins og þarna er að hefjast og því fagna ég henni. Þetta mun skapa mikla vinnu, þarna erum við að nýta auðlind og breyta henni vonandi yfir í vinnu fyrir fjölmarga og vöru sem við síðan flytjum út og sköpum gjaldeyri. Er það ekki einmitt það sem er svo mikilvægt fyrir okkur? Ég fer ekki á taugum yfir því þó að ég sjái jarðýtur og gröfur fara af stað. Ég fagna því,“ segir Kristján og bætir við að hið sama eigi við um fyrirhuguð Vaðlaheiðargöng. Þau séu einn liður í þessari uppbyggingu á Norðausturlandi til að efla atvinnu á svæðinu.