„Þó ég sé skepna inn að beini vil ég ekki ljúga,“ sagði Karl Vignir Þorsteinsson sem á upptökum í Kastljósi Ríkissjónvarpsins játaði kynferðisbrot gegn börnum. „Ég get ekki svarað því hvers vegna ég var ekki stoppaður af,“ sagði hann en Karl Vignir hefur ekki sætt refsingu fyrir brot sín.

Í Kastljósinu var fjallað ítarlega um málefni Karls Vignis sem játaði í síðasta mánuði allt að fimmtíu kynferðisbrot gegn börnum, meðal annars brot sem ekki eru fyrnd. Meðal fórnarlamba mannsins er tónlistarmaðurinn Bjartmar Guðlaugsson sem rifjaði upp samskipti sín við Karl Vigni í Kastljósi.

„Ég væri ekki að tjá mig um þetta ef þetta hefði ekki haft mikil áhrif á mig,“ sagði Bjartmar. Hann sagði brotið hafa gerst í Vestmannaeyjum, þegar feðurnir voru á sjónum og mæðurnar í frystihúsunum. Börnin hafi því mikið gengið laus. Þá hafi verið gott að komast inn á netaverkstæði aðventista, en Karl Vignir hafi unnið mikið fyrir trúfélagið. Það hafi verið fyrir tilstilli Karls Vignis að börn sóttu í verkstæðið. „Karl Vignir lokkaði börn þarna inn með sælgæti.“

„Ég man eftir því að hann sat þarna og tók okkur í fangið til að kenna okkur að hnýta. Þarna var strákur og hann var bara kominn inn á buxurnar hans. Svo kom að mér og ég settist í fangið á honum, vitandi hvað hann myndi gera. Hann fór bara inn á mig, inn fyrir nærbuxurnar og fiktaði í mér. Ég sá að það var spenningur í honum.“

Kastljós sendi tvær konur, fórnarlömb Karls Vignis, í heimsókn til hans með falda myndavél. Á upptökunum játar Karl Vignir meðal annars að hafa misnotað litla stúlku í Vestmannaeyjum, 10 eða 11 ára. Hann var þá spurður hvort það hefðu ekki verið fleiri börn í Eyjum. „Jú jú, það voru fleiri krakkar,“ sagði hann þá.

Konurnar spurðu Karl Vigni einnig á hvaða aldri börnin hefðu verið sem hann misnotaði. Sagðist hann telja að þau væru ellefu, tólf og þrettán ára. „Ég er búinn að líða svo mikið fyrir þetta. Ég hef ekki sofið heilu næturnar," sagði Karl Vignis og bætti við hann myndi vilja fá refsingu fyrir brot sín.