Eiríkur og Gunnar verðlaunaðir

Eiríkur Örn Norðdahl hlaut í dag Íslensku bókmenntaverðlaunin fyrir skáldsöguna Illsku og Gunnar F. Guðmundsson sagnfræðingur fyrir bókina Pater Jón Sveinsson - Nonni.

Forseti Íslands, Ólafur Ragnar Grímsson, afhenti verðlaunin á Bessastöðum. Þetta er í tuttugasta og fjórða skiptið sem verðlaunin eru afhent en fyrst var tilnefnt til þeirra árið 1989.

 „Þessi verðlaun hafa mikla þýðingu því þau staðfesta fyrir mér að ég var ekki að þessu til einkis. Það er þægileg tilfinning að finna að skrifin skipti fleiri máli en bara mig,“ segir Eiríkur Örn Norðdahl en ítarlega verður fjallað um verðlaunin í  Morgunblaðinu á morgun.

„Ég lít á þetta sem umbun sem ég met mikils, eftir langt og að sumu leyti erfitt verk, og er um leið þakklátur þeim sem hafa stutt mig á þessu langa vinnuferli,“ segir Gunnar F. Guðmundsson sagnfræðingur.

Þriggja manna lokadómnefnd, skipuð þeim Viðari Eggertssyni leikhússtjóra, Hrefnu Haraldsdóttur bókmenntafræðingi og  Stefaníu Óskarsdóttur stjórnmálafræðingi, sem var formaður, valdi verkin úr hópi tíu bóka sem tilnefndar voru til verðlaunanna 1. desember síðastliðinn, fimm í flokki fagurbókmennta og fimm í flokki fræðirita og bóka almenns efnis.

Íslensku bókmenntaverðlaunin nema einni milljón króna í hvorum flokki. Auk þess eru verðlaunahöfum afhent skrautrituð verðlaunaskjöl og verðlaunagripir, hannaðir af Jóni Snorra Sigurðssyni á gullsmíðaverkstæði Jens – opin bók á granítstöpli með nafni verðlaunahöfundar og bókar hans.

Eftirfarandi bækur voru tilnefndar til verðlauna í flokki fagurbókmennta:

Auður Ava Ólafsdóttir: Undantekningin                       

Eiríkur Örn Norðdahl: Illska                                      

Gyrðir Elíasson: Suðurglugginn                        

Kristín Ómarsdóttir: Milla                                       

Sigurjón Magnússon: Endimörk heimsins 

Eftirfarandi bækur voru tilnefndar til verðlauna í flokki fræðirita og bóka almenns efnis:

Einar Már Jónsson: Örlagaborgin. Brotabrot úr afrekasögu frjálshyggjunnar. Fyrri hluti

Gunnar F. Guðmundsson: Pater Jón Sveinsson – Nonni

Gunnar Þór Bjarnason: Upp með fánann. Baráttan um uppkastið 1908 og sjálfstæðisbarátta Íslendinga

Jón Ólafsson: Appelsínur frá Abkasíu. Vera Hertzsch, Halldór Laxness og hreinsanirnar miklu

Steinunn Kristjánsdóttir: Sagan af klaustrinu á Skriðu

Þeir sem áður hafa hlotið Íslensku bókmenntaverðlaunin eru:

1989 Stefán Hörður Grímsson

1990 Fríða Á. Sigurðardóttir og Hörður Ágústsson

1991 Guðbergur Bergsson og Guðjón Friðriksson

1992 Þorsteinn frá Hamri og Vésteinn Ólason, Guðrún Nordal, Sverrir Tómasson

1993 Hannes Pétursson og Jón G. Friðjónsson

1994 Silja Aðalsteinsdóttir og Vigdís Grímsdóttir

1995 Steinunn Sigurðardóttir og Þór Whitehead

1996 Böðvar Guðmundsson og Þorsteinn Gylfason

1997 Guðbergur Bergsson og Guðjón Friðriksson

1998 Hörður Ágústsson og Thor Vilhjálmsson

1999 Andri Snær Magnason og Páll Valsson

2000 Gyrðir Elíasson og Guðmundur Páll Ólafsson

2001 Hallgrímur Helgason og Sigríður Dúna Kristmundsdóttir

2002 Ingibjörg Haraldsdóttir og Pétur M. Jónasson, Páll Hersteinsson,

2003 Ólafur Gunnarsson og Guðjón Friðriksson

2004  Auður Jónsdóttir og Halldór Guðmundsson

2005 Jón Kalman Stefánsson og Kristín G. Guðnadóttir, Gylfi Gíslason, Arthur C. Danto, Matthías Jóhannessen, Silja Aðalsteinsdóttir, Eiríkur Þorláksson

2006 Ólafur Jóhann Ólafsson og Andri Snær Magnason

2007 Sigurður Pálsson og Þorsteinn Þorsteinsson

2008 Einar Kárason og Þorvaldur Kristinsson

2009 Guðmundur Óskarsson og Helgi Björnsson

2010 Gerður Kristný og Helgi Hallgrímsson

2011 Guðrún Eva Mínervudóttir og Páll Björnsson