Íslandsbanki endurgreiðir 20.000 viðskiptavinum vexti

Um 20.000 skilvísir viðskiptavinir Íslandsbanka munu  næstkomandi mánudag fá endurgreidda 30% af þeim vöxtum sem  þeir  greiddu  af húsnæðislánum og öllum almennum skuldabréfalánum hjá bankanum  á  síðasta  ári.   Undanskilin  eru  þau  húsnæðislán  sem  verða endurreiknuð   í   samræmi  við  dóma  Hæstaréttar  um  fullnaðarkvittanir.

Heildarupphæð  endurgreiðslunnar er um 2,5 milljarðar króna en að meðaltali mun  hver viðskiptavinur fá endurgreiddar um 120.000 krónur. Endurgreiðslan getur að hámarki numið 500.000 krónum á hvern viðskiptavin.

Upphæðin  verður  lögð  inn  á  sparnaðarreikning  í  nafni viðskiptavinar, Vaxtaþrep  30  dagar.   Reikningurinn  er bundinn og ber stighækkandi vexti eftir  fjárhæð  innstæðu.  Viðskiptavinir  geta  tekið  út af reikningnum á einfaldan hátt í gegnum Netbanka Íslandsbanka með 30 daga fyrirvara. Vextir á  reikningnum  eru  hærri  en á almennum óbundnum innlánsreikningum og eru greiddir  út mánaðarlega inn á ráðstöfunarreikning viðskiptavinar.   Því er hægt  að  ráðstafa  þeim  að  vild  í  lok  hvers mánaðar án þess að hreyfa höfuðstólinn.

Í tilkynningu frá Íslandsbanka segir að með  því  að  greiða  upphæðina  inn  á Vaxtaþrep 30 daga vilji bankinn leggja  grunn að sparnaði viðskiptavina sinna en hafa ber i huga að í sumum tilvikum getur besti sparnaðurinn falist í að greiða niður skuldir sem bera háa  vexti. Viðskiptavinir eru hvattir til að panta sér viðtal hjá ráðgjafa í  útibúum  Íslandsbanka  til að fara yfir hvaða sparnaðarleiðir henta þeim best.

„Við vonum að með þessari endurgreiðslu geti margir lagt grunn að sparnaði eða greitt niður skuldir. Við viljum þakka viðskiptavinum fyrir viðskiptin á undanförnum árum og þá tryggð sem þeir hafa sýnt okkur. Við finnum fyrir ákveðnum þáttaskilum í umhverfi okkar og vonum að viðskiptavinir okkar geti horft bjartari augum til framtíðar,“ segir Birna Einarsdóttir, bankastjóri Íslandsbanka, í fréttatilkynningu.

• Blogga um frétt