Gatnamót Grensásvegar og Miklubrautar eru ennþá þau hættulegustu á landinu, hvað fjölda slysa varðar. Þar hafa orðið 174 slys og óhöpp á síðustu 5 árum, frá 2008-2012. Þrenn gatnamót við Miklubraut eru á lista yfir 20 verstu slysagatnamót landsins.

Í nýrri skýrslu Umferðarstofu um slys í umferðinni eru m.a. teknar saman upplýsingar um <a href="/frettir/innlent/2013/04/21/versti_vegkaflinn_er_a_sudurlandsvegi/">verstu vegakafla landsins</a>, sem og um hættulegustu gatnamótin í þéttbýli. Sjálfsagt kemur fáum á óvart að heyra að gatnamót Miklubrautar og Grensásvegar séu þar efst á lista enda hafa flest slys orðið þar um nokkurra ára skeið.

Miðað er við 5 ára tímabil þegar slysin eru talin saman og hafa slys, með og án meiðslum, á þessum gatnamótum verið á bilinu 169 til 185 á hverju 5 ára tímabili frá 2004 til 2012.

<strong>Þúsundir ökutækja á sólarhring</strong>

Alls eru þrenn gatnamót við Miklubraut efst á listanum yfir þau 20 hættulegustu í þéttbýli síðustu 5 árin. Á eftir Grensás/Miklabraut eru næstflest slys á gatnamótum Miklubrautar og Kringlumýrarbrautar, alls 147. Í þriðja sæti eru gatnamót Miklubrautar og Háaleitisbrautar, þar sem urðu 142 slys.

Ein helsta skýringin á þessu er auðvitað sú að Miklabrautin er helsta umferðaræð borgarinnar og um hana fara þúsundir ökutækja á hverjum sólarhring. Þó er leitast við að greina orsakir slysanna sem þarna verða og girða fyrir að þau endurtaki sig ef hægt er. Á sínum tíma munaði t.d. talsvert um það þegar sett voru upp beygjuljós á gatnamótum Miklubrautar og Kringlumýrarbrautar.

Í fjórða sæti listans eru gatnamót Hringbrautar við Njarðargötu, þar sem urðu 126 slys á síðustu 5 árum. Í fimmta sæti eru krossgötur Hafnafjarðarvegar, Reykjavíkurvegar, Fjarðarhrauns og Álftanesvegar, þar sem urðu 111 slys á síðustu 5 árum.

<strong>Slysum fjölgaði við Lækjargötu</strong>

Þegar litið er til slysa með meiðslum lítur listinn aðeins öðru vísi út, en þó eru gatnamót Miklubrautar og Grensásvegar einnig efst á lista því þar urðu 25 slys með meiðslum á síðustu 5 árum. Önnur hættulegustu gatnamótin hvað þetta varðar eru Bústaðavegur/Reykjanesbraut, þar urðu 22 slys með meiðslum.

Í þriðja sæti er Miklabrautin aftur á gatnamótum við Háaleitisbraut, þar sem urðu 18 slys með meiðslum á síðustu 5 árum, og í fjórða sæti eru gatnamót Miklubrautar og Kringlumýrarbrautar, þar sem urðu 15 slys með meiðslum á tímabilinu.

Á þennan lista bætast ein ný gatnamót við síðan í fyrra, en það eru mót Lækjargötu, Bankastrætis og Austurstrætis. Þau eru í 12. sæti listans og urðu þar 10 slys með meiðslum á tímabilinu 2008-2012. Á móti detta út gatnamót Fífuhvammsvegar og Dalsvegar, sem voru meðal þeirra hættulegustu í fyrra.

Að öðru leyti eru sömu gatnamót á þeim lista á milli ára, enda um fimm ára summu að ræða og því er um að ræða hægari breytingar en ella. 

Lista yfir hættulegustu gatnamótin í þéttbýli má sjá hér að neðan:

<strong>Slys og óhöpp, með og án meiðsla 2008-2012:</strong>

<ul> <li>Miklabraut / Grensásvegur - 174</li> <li>Miklabraut / Kringlumýrarbraut - 147</li> <li>Miklabraut / Háaleitisbraut - 142</li> <li>Hringbraut / Njarðargata - 126</li> <li>Hafnarfjarðarvegur / Reykjavíkurvegur / Fjarðarhraun / Álftanesvegur - 111</li> <li>Bústaðavegur / Reykjanesbraut - 89</li> <li>Flatahraun / Bæjarhraun - 86</li> <li>Reykjanesbraut / Lækjargata / Hlíðarberg - 84</li> <li>Suðurlandsbraut /Kringlumýrarbraut / Laugavegur - 79</li> <li>Hringbraut / Melatorg / Suðurgata - 76</li> <li>Kringlumýrarbraut / Háaleitisbraut - 74</li> <li>Kringlumýrarbraut / Listabraut - 64</li> <li>Nýbýlavegur / Skemmuvegur / Dalvegur / Nýbýlavegur - 63</li> <li>Bæjarháls / Höfðabakki / Straumur - 63</li> <li>Breiðholtsbraut / Stekkjarbakki / Skógarsel - 62</li> <li>Rampi Stekkjarbakka / Reykjanesbraut - 56</li> <li>Suðurlandsbraut / Skeiðarvogur / Fákafen - 55</li> <li>Bústaðavegur / Flugvallarvegur - 53</li> <li>Borgartún / Kringlumýrarbraut - 51</li> <li>Reykjanesbraut / Fjarðarhraun - 50</li> </ul><div><strong>Slys með meiðslum 2008-2012:</strong></div> <ul> <li>Miklabraut / Grensásvegur - 25</li> <li>Bústaðavegur / Reykjanesbraut - 22</li> <li>Miklabraut / Háaleitisbraut - 18</li> <li>Miklabraut / Kringlumýrarbraut - 12</li> <li>Hraunbrún / Reykjavíkurvegur / Flatahraun - 14</li> <li>Sæbraut / Kringlumýrarbraut - 14</li> <li>Breiðholtsbraut / Stekkjarbakki / Skógarsel - 13</li> <li>Borgartún / Kringlumýrarbraut - 12</li> <li>Hringbraut / Njarðargata - 12</li> <li>Hafnarfjarðarvegur / Reykjavíkurvegur / Fjarðarhraun / Álftanesvegur - 11</li> <li>Háaleitisbraut / Bústaðavegur - 11</li> <li>Lækjargata / Austurstræti / Bankastræti - 10</li> <li>Sæbraut / Holtavegur - 9 </li> <li>Suðurlandsbraut / Kringlumýrarbraut / Laugavegur - 9</li> <li>Kringlumýrarbraut / Háaleitisbraut - 8</li> <li>Lyngháls / Stuðlaháls - 8</li> <li>Hólahraun / Fjarðarhraun - 7</li> <li>Nýbýlavegur / Skemmuvegur / Dalvegur / Nýbýlavegur - 7</li> <li>Suðurlandsbraut / Grensásvegur / Engjavegur - 7</li> <li>Kringlumýrarbraut na-rampur / Bústaðavegur / Kringlumýrarbraut sa-rampur - 7</li> </ul>

Nánari upplýsingar er að finna í

<a href="http://www.us.is/files/slysaskyrsla2012.pdf">slysaskýrslu Umferðarstofu 2012</a>

.

Frétt mbl.is: 

<a href="/frettir/innlent/2013/04/21/versti_vegkaflinn_er_a_sudurlandsvegi/">Versti vegkaflinn er á Suðurlandsvegi</a>