Réttað verður í Staðarrétt í Skagafirði í kvöld. Bændur í Staðar- og Seyluhreppum í Skagafirði héldu í göngur snemma í morgun og verður réttað strax í ljósi óveðursins sem spáð hefur verið.

Á húnvetnsku fréttasíðunni Feyki er haft eftir Bjarna Bragasyni sauðfjárbónda á Halldórsstöðum að ágætlega hafi gengið að manna göngur, þrátt fyrir lítinn fyrirvara.

Sjálfur lagði Bjarni upp með hesta á kerru um sjöleytið í morgun og lá leiðin á Vatnsskarð og Bólstaðarhlíð. „Svo smölum við hérna til baka og nýtum bílana og tæknina eins og hægt er,“ sagði hann í samtali við Feyki um leið og lagt var í hann.

Veður var nokkuð hagstætt í dag og má ætla að smalamennskan hafi gengið þokkalega. Fram kemur á Feyki að allar hendur séu vel þegnar til aðstoðar við réttarstörfin í kvöld.

Uppfært kl. 17:15: Í upphafi var stefnt að því að réttað yrði kl. 16 en það hefur tafist. Nú mun stefnt að því að réttir hefjist kl. 18, samkvæmt heimildum mbl.is

Tengdar fréttir

Óveðri er spáð um helgina

Verkefnum björgunarsveita lokið

• Björgunarsveitir kallaðar út
• Rifnaði upp með rótum í miðborginni
• Réttað í grenjandi rigningu
• Varað við fjúkandi munum

» Fleiri tengdar fréttir

• 1 blogg um fréttina

Bloggað um fréttina

• Ómar Ragnarsson: Almenn flýting hugsanlega til góðs.