Lögreglan á höfuðborgarsvæðinu hefur birt upptöku af neyðarkalli sem barst sunnudaginn 2. febrúar sl., laust fyrir klukkan þrjú síðdegis, frá báti úti við Faxaflóa. Þeir sem þekkja röddina og vita hver þarna talar eru vinsamlegast beðnir um að hafa samband við lögregluna.

Í neyðarkallinu sagði meðal annars: „Báturinn er farinn að leka mikið og við erum að fara í flotgallana,” sagði m.a. í tilkynningunni.

Brugðist var skjótt við og hófst mikil leit að bátnum, enda málið talið grafalvarlegt. Reynt var árangurslaust að ná aftur sambandi við tilkynnanda, en engar frekari upplýsingar voru um bátinn eða staðsetningu hans.

Báturinn fannst ekki þrátt fyrir viðamikla leit, en grunur leikur á að um hafi verið að ræða visvítandi ranga tilkynningu senda til vaktstöðvar neyðarsímsvörunar.

Málið er nú til rannsóknar hjá lögreglunni á höfuðborgarsvæðinu, sem birtir hljóðupptöku af neyðarkallinu.

Þeir sem þekkja röddina og vita hver þarna talar eru vinsamlegast beðnir um að hafa samband við lögregluna í síma 444-1000, en upplýsingum má einnig koma á framfæri á netfangið abending@lrh.is eða í einkaskilaboðum á fésbókarsíðu lögreglunnar á höfuðborgarsvæðinu.

Tengdar fréttir

Leit á Faxaflóa

Málið enn í rannsókn

• Fá m.a. ábendingar á Facebook
• Fá ábendingar vegna neyðarkalls
• Úr litlu að moða við rannsókn
• Lögregla rannsakar mögulegt gabb

» Fleiri tengdar fréttir

• Blogga um frétt