Innlent | mbl | 21.3.2014 | 18:28 | Uppfært 18:50

Hvetur til fríverslunarviðræðna við Japan

Stjórn Verslunarráðs Íslands í Japan en ráðið skipa 22 fulltrúar og þar á meðal fulltrúar nokkurra stærstu fyrirtækja Japans. Bolli Thoroddsen formaður lengst til vinstri. mbl.is

Verslunarráð Íslands í Japan hefur sent frá sér fréttatilkynningu þar sem fagnað er þingsályktunartillögu sem Össur Skarphéðinsson, þingmaður Samfylkingarinnar og fyrrverandi utanríkisráðherra, lagði fram á Alþingi í gær ásamt fjórum öðrum þingmönnum þess efnis að hafinn verði undirbúningur að fríverslunarviðræðum við Japan.

Sömuleiðis er fagnað fundi sem Sigurður Ingi Jóhannsson, umhverfis- og auðlindaráðherra, átti með Nobuteru Ishihara, umhverfisráðherra Japans, í Tókýó 17. febrúar síðastliðinn þar sem einnig hafi verið rætt um fríverslunarsamning á milli landanna. Hvetur ráðið jafnframt til þverpólitískrar samstöðu um málið. Verslunarráðið hafi unnið að því markmiði á undanförnum vikum og mánuðum að slíkar viðræður geti hafist.

„Ljóst er að japönsk stjórnvöld vinna nú markvisst að því að styrkja samkeppnishæfni sína á alþjóðavettvangi og hafa nú þegar gert 13 tvíhliða fríverslunarsamninga og vinna að gerð sjö til viðbótar. Á sama tíma leggja japönsk stjórnvöld meiri áherslu á frekara samstarf við Ísland eins og fram hefur komið í viðræðum japanskra stjórnvalda við hin svokölluðu NB8-ríki, þ.e. norrænu þjóðirnar og Eystrasaltsríkin,“ segir í tilkynningunni.

Bent er á að utan Evrópu sé Japan annað stærsta viðskiptaland Íslands að undanskildum Bandaríkjunum og ennfremur þriðja stærsta efnahagsveldi heims. „Framundan eru mjög spennandi tímar í samstarfi Íslands og Japans. Á næsta ári fagna þjóðirnar 60 ára stjórnmálasamstarfi. Samstarf ríkjanna hefur reynst gæfuríkt fyrir báða aðila og því hvetur Verslunarráð Íslands í Japan til þverpólitískrar samstöðu um fríverslunarviðræður við Japan.“