Nokkur vitni hafa gefið sig fram

Lögreglu hafa borist ábendingar varðandi rannsókn á því hvort ungri konu hafi verið nauðgað í Reykjavík aðfaranótt laugardags. Að sögn Friðriks Smára Björgvinssonar, yfirmanns rannsóknardeildar lögreglunnar, hafa þessar ábendingar varpað skýrara ljósi á atvik.

Einn var handtekinn í tengslum við rannsóknina um helgina og yfirheyrður í tengslum við málið en síðan sleppt að loknum yfirheyrslum að sögn Friðriks Smára en maðurinn er ekki talinn tengjast málinu á neinn hátt.  

Friðrik Smári segir að rannsóknin sé í fullum gangi og lítið hægt að segja um hana að svo stöddu.

Ung kona leitaði á neyðar­mót­töku Land­spít­al­ans í Foss­vogi kl. 5 á laugardagsmorg­un, en grun­ur leik­ur á að henni hafi verið nauðgað. Lög­regl­an á höfuðborg­ar­svæðinu auglýsti síðdegis á laugardag eftir vitnum í tengslum við rannsóknina.

Að sögn lög­reglu fór kon­an, sem er um tví­tugt, á skemmti­staðina B5 og English Pub í miðborg Reykja­vík­ur en síðan er ekki vitað um ferðir henn­ar fyrr en hún bankaði upp á og leitaði aðstoðar í heima­húsi við Lang­holts­veg. Þaðan var henni ekið á neyðar­mót­töku.

Talið er að kon­an hafi knúið dyra á nokkr­um stöðum á Hóls­vegi og Lang­holts­vegi áður en eft­ir henni var tekið. Hún kom að sögn lög­reglu að Hóls­vegi frá Hjalla­vegi, og gekk síðan áfram Lang­holts­veg.

Lög­regla biðlar til al­menn­ings við rann­sókn máls­ins, og leit­ar upp­lýs­inga um ferðir kon­unn­ar í nótt og annað sem kann að varpa ljósi á málið.

Kon­an, sem er með dökkt axl­rsítt hár og bein­an topp, var klædd í dökk­ar bux­ur, hvít­an jakka, bleik/​​app­el­sínu­gul­an topp og var í dökk­um skóm með pinna­hæl­um. Hún var með stórt háls­men (gyllt­ir hlekk­ir). Kon­an er í meðallagi há.

Þeir sem geta veitt upp­lýs­ing­ar um málið eru vin­sam­leg­ast beðnir að hafa sam­band við lög­reglu. Upp­lýs­ing­um má koma á fram­færi í einka­skila­boðum á face­booksíðu lög­regl­unn­ar á höfuðborg­ar­svæðinu, í tölvu­pósti á net­fangið abend­ing@lrh.is eða í síma 444-1000.