Neytendasamtökin mótmæla harðlega þeim áformum sem koma fram í fjárlagafrumvarpi næsta árs um að virðisaukaskattur á matvæli verði hækkaður úr 7% í 12%. Fram hafi komið að tekjulægstu heimilin verji 17,6% ráðstöfunartekna sinna í matar- og drykkjarvörur, á móti 10,7% hjá tekjuhæstu heimilunum. Því sé ljóst að þetta komi verst við tekjulægri heimili.

Þá segjast samtökin ekki fallast á þau rök stjórnvalda að þetta sé til einföldunar á skattakerfinu enda verði áfram tvö virðisaukaskattsþrep, þó svo að annað hækki um fimm prósentustig en hitt lækki um eitt og hálft prósentustig.

„Minnt er á að það voru einmitt sömu flokkar í ríkisstjórn þegar ákveðið var að lækka virðisaukaskatt á matvörur úr 14% í 7%. Neytendasamtökin studdu eindregið þá aðgerð og hljóta því að spyrja hvað hafi breyst síðan þá,“ segir í frétt á vef samtakanna.

Neytendasamtökin gera ráð fyrir að hækkun á matarskatti komi fram í verðlagi um leið og hún tekur gildi og hafi þar með umtalsverð áhrif á verðtryggingu húsnæðislána. En samtökin hafa áhyggjur af því að lækkanir í efra þrepi virðisaukaskatts og niðurfelling vörugjalda muni ekki skila sér til neytenda í sama mæli, enda hafi dæmin sýnt að slíkar lækkanir skila sér í mörgum tilvikum illa  til neytenda. Nema því aðeins að  stjórnvöld komi á fót sérstöku eftirliti til að fylgjast með að lækkanir skili sér í verðlagi. „Gera Neytendasamtökin því þá kröfu, verði þessar tillögur að veruleika, að því verði sérstaklega fylgt eftir, að umræddar lækkanir skili sér til neytenda.“

Tengdar fréttir

Matarútgjöld heimilanna

ASÍ tekur við Facebook-síðu Bryndísar

• Áhrif VSK-breytinga lítil sem engin
• Bjarna Ben-megrunarkúrinn í Nettó
• Eyðir 135 þúsund í mat og drykk
• Vill Bryndísi ekki úr flokknum

» Fleiri tengdar fréttir

• Blogga um frétt