Vefsíða tengd svonefndu Ríki íslams sem Advania lét loka í gær vegna brota á viðskiptaskilmálum er komin upp á nýjan leik undir íslenska léninu Khilafah.is. Vefsíðan var hýst hjá Thor Data Center sem er í eigu Advania í gegnum þriðja aðila. Eftir að henni var lokað í gær voru birt skilaboð á vefslóðinni um að stefnt væri að því að opna hana aftur bráðlega.

Vakin var athygli á tilvist vefsíðunnar í gær en henni virðist ætlað að vera einhvers konar fréttasíða fyrir hryðjuverkasamtökin Ríki íslams sem lagt hefur undir sig mikið landsvæði í Írak og Sýrlandi og stofnað þar að eigin sögn kalífadæmi (orðið „khilafah“ þýðir kalífadæmi). Samtökin hafa framið hrottaleg hermdarverk á yfirráðasvæði sínu og meðal annars tekið fjölda fólks af lífi. Myndbönd í tengslum við slíkar aftökur eru meðal þess efnis sem birt er á síðunni.

Sigmundur Davíð Gunnlaugsson dómsmálaráðherra var upplýstur um málið í gær og var í kjölfarið tilkynnt að hafin væri skoðun á því af hálfu innanríkisráðuneytisins. Ögmundur Jónasson, þingmaður Vinstrihreyfingarinnar - græns framboðs, sagði í samtali við mbl.is í gærkvöldi að hann vonaðist til þess að Alþingi tæki málið að sama skapi til skoðunar. Ekki væri æskilegt að slíkir aðilar tengdu sig við Ísland með þessum hætti með notkun íslensks léns.

Tengdar fréttir

Vefsíða tengd Ríki íslams

Ríkið eykur vald sitt yfir .is lénum

• Vefsíða Ríkis íslams opnuð á ný
• Ríki íslams komið með nýtt lén
• Rétthafinn núna skráður í Bretlandi
• Slæm lén ekki til, bara slæm notkun

» Fleiri tengdar fréttir

• Blogga um frétt