„Lofaður sé Allah, ISNIC hefur neitað að heimila Khilafah.is að nota áfram lénaendinguna þeirra. Ef Allah lofar opnar vefsíðan brátt aftur.“ Þetta segir á Twitter-síðunni @QA.AF sem sömu aðilar halda úti og stóðu að vefsíðunni Khilafah.is sem aftur tengdist hryðjuverkasamtökunum Ríki íslams. ISNIC ákvað að loka léninu í gær þar sem notkun þess samrýmdist ekki íslenskum lögum.

Vakin var athygli á vefsíðunni á laugardaginn. Hún væri bæði hýst hér á landi og skráð á íslenskt lén. Í kjölfarið lokaði Advania á hýsingu síðunnar eftir að hafa frétt af innihaldi hennar þar sem það samrýmdist ekki viðskiptaskilmálum þess. Vefsíðan var hýst hjá fyrirtækinu í gegnum þriðja aðila. Í kjölfarið lá síðan niðri um tíma en var síðan opnuð aftur aðfaranótt sunnudags og hafði þá verið flutt til Lettlands í gegnum hýsingarfyrirtæki í Svíþjóð.

ISNIC ákvað síðan í kjölfarið að loka á lénið sem fyrr segir. Hafin var ennfremur skoðun á málinu í innanríkisráðuneytinu á laugardag eftir að Sigmundur Davíð Gunnlaugsson dómsmálaráðherra var upplýstur um málið. Ráðherrann sagði í samtali við mbl.is í gær að sá möguleiki þyrfti að vera fyrir hendi að hægt væri að loka íslenskum lénum sem notuð væru með slíkum hætti.

Tengdar fréttir

Vefsíða tengd Ríki íslams

Ríkið eykur vald sitt yfir .is lénum

• Vefsíða Ríkis íslams opnuð á ný
• Ríki íslams komið með nýtt lén
• Rétthafinn núna skráður í Bretlandi
• Slæm lén ekki til, bara slæm notkun

» Fleiri tengdar fréttir

• Blogga um frétt