Töluverð röskun hefur verið á millilandaflugi í dag vegna veðurs. Að sögn Guðjóns Arngrímssonar, upplýsingafulltrúa Icelandair, hefur nú þegar þurft að aflýsa flugi til og frá London, Osló og Stokkhólmi. Þá hefur einnig þurft að fresta leiguflugi flugfélagsins til Vínarborgar.

Guðjón segir um 1.500 farþega vera í vandræðum vegna þessa, bæði hér á landi og erlendis. Seinkanir hafa einnig orðið á fjölda flugferða.

Upplýsingar um brottfarir, komu og frestanir á flugi má finna á textavarpi og heimasíðum flugfélaganna og Keflavíkurflugvallar og er fólk hvatt til að fylgjast vel með því hlutirnir geta breyst hratt. 

Eins og mbl.is greindi frá hefur WOW air fellt niður flugferð sem fara átti til Lundúna og Berlínar í dag. Vél félagsins frá Kaupmannahöfn lenti á Akureyri í dag.