Sýknudómur yfir Karli Wernerssyni og öðrum í Milestone-málinu svonefnda er í samræmi við væntingar hans og er hann afar ánægður með niðurstöðu Héraðsdóms Reykjavíkur. Þetta segir Ólafur Eiríksson, verjandi Karls, og einnig að hann voni að ríkissaksóknari uni niðurstöðunni.

Ólafur segir að dómurinn rökstyðji niðurstöðu sína mjög vel, meðal annars með vísun til sérfróðra matsmanna sem sátu í fjölskipuðum héraðsdóminum. „Að teknu tilliti til þess alls gerir Karl sér vonir um að dómnum verði ekki áfrýjað, að ákæruvaldið uni niðurstöðunni.“

Héraðsdómur sýknaði Guðmund Ólason, fv. for­stjóra Milest­one, Karl, fv. stjórn­ar­formann, og Stein­grím­, fv. stjórn­ar­mann, af ákæru um umboðssvik vegna greiðslna Milestone til Ing­unn­ar Werners­dótt­ur fyr­ir hluti henn­ar í Milest­one, Milest­one Import Export og Leiftra en þær námu á sjötta millj­arð króna á ár­un­um 2006 og 2007.

Jafn­framt voru end­ur­skoðend­urn­ir Hrafn­hild­ur Fann­geirs­dótt­ir, Mar­grét Guðjóns­dótt­ir og Sig­urþór Char­les Guðmunds­son, öll frá end­ur­skoðun­ar­fyr­ir­tæk­inu KPMG, sýknuð af ákæru um brot gegn lög­um um end­ur­skoðend­ur. Þau Mar­grét og Sig­urþór voru enn­frem­ur sýknuð af ákæru um meiriháttar brot á lög­um um árs­reikn­inga vegna viðskipt­anna.

Samkvæmt því sem kemur fram í niðurstöðu héraðsdóms er að eigendur og stjórnendur Milestone höfðu fulla heimild til að láta félagið fjármagna kaupin á hlutum Ingunnar, það hafi ekki valdið félaginu verulegri fjártjónshættu og endurheimt fjárins ekki verið ótryggð.

„Mér sýnist sem héraðsdómur hafi metið það sem svo að þær varnir sem verjendur komu fram með hafi verið eðlilegar og í samræmi við málavexti,“ segir Ólafur um dóminn.

Tengdar fréttir

Milestone-málið

Endurupptökubeiðni Karls hafnað

• Hafnaði endurupptökubeiðni Steingríms
• Milestone-málinu vísað frá Hæstarétti
• Greiða um 200 milljónir úr þrotabúi Milestone
• „Þessi kæra var ekki að detta í hús í gær“

» Fleiri tengdar fréttir

• Blogga um frétt