Milli horfinna flugvéla, ebólu faraldursins, ótal lekamála og alls þess góða fólks sem heimsbyggðin missti á árinu virðist 2014 hafa verið borið ofurliði af slæmum fréttum. Ljóst er að árið hefur verið mörgum þungbært en þrátt fyrir þá erfiðleika sem steðjað hafa að var 2014 einnig uppfullt af góðum fréttum, jafnt innan lands sem utan. Börn fæddust, ýmislegt var afrekað og studd var við góð málefni sem aldrei fyrr. Fréttirnar hér að neðan ættu að geta yljað okkur öllum um hjartaræturnar þrátt fyrir að vera aðeins brotabrot af því góða sem árið bar í skauti sér.

1. Vá-Gústa sigraðist á krabbameini.

Ágústa, er engin venjuleg sjö ára stúlka. Sex ára gömul greindist hún með heilaæxli og eyddi í kjölfarið ári í erfiða krabbameinsmeðferð.  Þar fór hún í yfir 40 svæf­ing­ar, fjór­ar aðgerðir, var 88 daga í ein­angr­un og fimm daga í önd­un­ar­vél. Ágústa er hinsvegar í raun ofurhetjan Vá-Gústa og sigraðist með ofurkröftum sínum á krabbameininu.

Smelltu hér til að lesa um Vá-Gústu.

2. Einstæð móðir átti báða vinningsmiðana.

84,5 króna lottóvinningi var deilt niður á tvo miða í maí. Þegar eigandi annars miðans, einstæð þriggja barna móðir og 75% öryrki, fór að sækja vinninginn sinn kom óvænt í ljós að hinn vinningsmiðinn var einnig hennar. Konan hafði týnt þeim miða og það var einmitt þess vegna sem hún keypti þann seinni. Sem betur fer fann hún miðann á ný, að sögn fyrir tilstuðlan afa síns heitins, undir bílstjórasætinu sínu.

Smelltu hér til að lesa meira um vinningshafann

3. „Ég fór bara að vinna.“

Skeifubruninn svokallaði flokkast að sjálfsögðu ekki sem góð frétt en vösk framganga slökkviliðsmanna var þó til fyrirmyndar. Sérlega eftirtektarvert var starf slökkviliðsmannsins Stefáns Más Kristinssonar sem gaf lítið fyrir frívaktina sína og dembdi sér í starfið, íklæddur stuttbuxum og strigaskóm.

 Smelltu hér til að lesa meira um Stefán

4. Standandi fæðing á Vesturlandsvegi.

Hjónin Hafsteinn Steinsson og Elín Kristjánsdóttir Linnet voru á leið úr Norðlingaholti á Landspítalann þegar Elín, sem var ólétt af tíburum fann að sá fyrri myndi ekki bíða mikið lengur. Tók hún sjálf á móti barninu, standandi á Vesturlandsveginum, í morgunumferðinni á þriðjudegi.

Smelltu hér til að lesa meira up ævintýrið á Vesturlandsvegi.

5. Íslenskir karlmenn skara fram úr.

Íslenskir karlmenn sönnuðu það enn og aftur að þeir eru sko alls engar gungur. Þegar þetta er skrifað hafa tæplega 9.000 íslenskir karlmenn skrifað undir yfirlýsingu þess efnis að þeir styðji jafnrétti kynjanna á vefsíðu herferðarinnar HeForShe. Þóttu Íslenskir karlmenn fljótir til að bregðast við og samkvæmt Ingu Dóru Pétursdóttur, framkvæmdastýru UN Women á Íslandi, hefur árangurinn hér á landi heillað erlent samstarfsfólk hennar.

Smelltu hér til að lesa meira um árangur íslenskra karlmanna

6. Gaf Rögnu hluta af lottóvinningnum.

Fjölmargir velviljaðir einstaklingar höfðu samband við Rögnu Erlendsdóttur, einstæða, tveggja barna móður, eftir að hún greindi frá því í viðtali við Morgunblaðið að hún væri komin á götuna. Einn slíkur einstaklingur var kona um áttrætt sem unnið hafði tugi milljóna í lottó og ákvað að styrkja Rögnu um 500 þúsund krónur.

„Ég er eig­in­lega að þakka fyr­ir að ég hef aldrei þurft að standa í þess­um spor­um. Ég var svo ánægð þegar ég var búin að fara í bank­ann að milli­færa þetta. Það var eitt af því dá­sam­leg­asta sem ég hef gert um dag­ana. Það er sælt að þiggja en líka sælt að gefa,“ sagði kon­an sem var að strauja gard­ín­ur þegar blaðamaður sló á þráðinn.

Smelltu hér til að lesa meira um gjafmilda ellilífeyrisþegann.

7. Aðstoðaði við fæðingu í heimsreisunni.

Nanna Tul­inius Ottós­dótt­ir var á ferðalagi milli eyjunnar Koh Tao í Taílandi til eyjunnar Koh Panghan á lítilli ferju þegar kona um borð fékk hríðir. Frásögn Nönnu er kostuleg en þegar spurt var hvort læknir væri um borð rétti hún upp hönd og sagðist kunna skyndihjálp, án þess að vita hvað hún væri að koma sér út í. Þrátt fyrir erfiðar aðstæður og mikinn öldugang kom heilbrigður Taílenskur drengur í heiminn með dyggri aðstoð Nönnu sem sagði tilfinninguna magnaða.

Smelltu hér til að lesa meira um ævintýri Nönnu.

8. Seldi kaffi til styrktar einhverfum.

Sverrir Rolf Sander opnaði kaffihúsið Puffin Coffee heima hjá sér í sumar. Kaffið og tilfallandi góðgæti afhenti hann út um gluggann á Baldursgötu 26 og gat fólk greitt fyrir bollann með frjálsum framlögum. Kaffihúsið var leið Sverris til að safna áheitum fyrir hjólaferð um Bretland sem hann tók þátt í til styrktar rannsóknum á einhverfu. Gaf hann yfir þúsund kaffibolla í sumar og raunar var svo vel tekið í framtakið að hann ákvað að halda því áfram á handahófskenndum tímum.

Smelltu hér til að lesa meira um Puffin Coffee.

9. Komst inn í Princeton og Harvard.

„Ég fékk fyrst bréfið frá Princet­on og varð hrika­lega glöð nátt­úr­lega. En á meðan ég var að lesa það kom tölvu­póst­ur frá Har­vard,“ sagði Guðrún Val­dís Jóns­dótt­ir í sam­tali við mbl.is. Háskólarnir eru með þeim bestu í heimi og var komst Guðrún inn bæði á grundvelli góðs námsárangurs og fótboltahæfileika.  

Smelltu hér til að lesa meira um afrek Guðrúnar.

10. Fékk nýja mömmu og fjórar systur.

Það var ekki átaka­laust fyr­ir st. bern­h­arðshvolp­inn Lillu að koma í heim­inn en Nora mamma henn­ar veikt­ist á meðgöng­unni. Þrír hvolp­ar dráp­ust en Lilla lifði af og Nora var af­lífuð, enda illa hald­in. Tík­in Þula gekk Lillu í móðurstað og ólst hún upp með fjór­um hvolp­um, sem er síður en svo sjálf­gefið. 

Smelltu hér til að lesa meira um Lillu.

11. Sögulegur sigur Íslendinga.

Hvað sem hverjum finnst um boltaíþróttir gátu allir hrifist með þegar íslenska karla­landsliðið í knatt­spyrnu vann einn sinn stærsta, ef ekki þann al­stærsta, sig­ur frá upp­hafi. Liðið skellti Hol­lend­ing­um, bronsliði síðasta HM, á Laug­ar­dals­velli þann 13. október í undan­keppni EM í knatt­spyrnu, 2:0. Þrátt fyrir tap gegn Tékkum á liðið enn góða möguleika á að komast á EM en næsti leikur liðsins er í mars 2015 við Kasakstan.

Smelltu hér til að sjá fleiri myndir frá sigrinum sögulega.

12. Sagði óvart frá óléttunni í kvöldfréttum Rúv.

Þrátt fyrir að Sylvía Dag­mar Briem og kær­asti henn­ar Emil Þór Jó­hanns­son hafi ekki ætlað sér að deila fréttinni af erfingjanum með alþjóð eru þau væntanlega sæl með góða sögu í dag. Sylvía vinn­ur á RÚV og hafði fengið Boga Ágúst­son til að taka upp frétt af ólétt­unni að kvöld­frétt­um lokn­um og ætluðu skötu­hjú­in svo að deila henni með vin­um og vanda­mönn­um. Mynd­in sem fylgja átti barneigna­frétt­inni rataði hins­veg­ar óvart inn í í beina út­send­ingu í nokkr­ar sek­únd­ur svo alþjóð fékk óvænt að vita af barnaláni Sylvíu og Em­ils. 

Smelltu hér til að lesa meira um óvænta tilkynningu parsins.

13. Frosti fannst eftir þrjú ár.

Það voru svo sann­ar­lega fagnaðar­fund­ir þegar fresskött­ur­inn Frosti hitti eig­end­ur sína á nýj­an leik eft­ir þrjú ár á ver­gangi í fé­lags­skap villikatta. Eig­end­urn­ir voru bún­ir að gefa upp alla von á að finna Frosta á ný og ætluðu ekki að trúa sín­um eig­in aug­um þegar Frosti birt­ist á Face­book-síðu fé­lags­ins Villikett­ir.

Smelltu hér til að lesa meira um ævintýri Frosta.

Tengdar fréttir

Árið 2014

Bestu innlendu myndir ársins

• Vinsælustu myndskeið ársins
• Frægir sem féllu frá á árinu
• Furðulegustu fréttir ársins
• Erlendu fréttamyndir ársins 2014

» Fleiri tengdar fréttir

• Blogga um frétt