Innlent | mbl | 27.4.2015 | 9:29

Sakar Hæstarétt um að spila með

Jón Ásgeir Jóhannesson við upphaf Baugsmálsins svonefnda árið 2007. mbl.is/Þorvaldur Örn Kristmundsson

Jón Ásgeir Jóhannesson, kaupsýslumaður, sakar Hæstarétt um að spila með í aðsendri grein sem hann ritar í Fréttablaðið í dag. Hann er ákærður í Aurum-málinu svokallaða en Hæstiréttur ómerkti í síðustu viku sýknudóm héraðsdóms og verður að taka það aftur fyrir í héraði.

Grein Jóns Ásgeirs er birt á miðopnu Fréttablaðsins þar sem Guðmundur Andri Thorsson ritar venjulega pistil á mánudögum. Þar segir Jón Ásgeir að um hafi verið að ræða fullkomlega eðlileg viðskipti sem embætti sérstaks saksóknara reyni að klæða í glæpabúning.

Kann 100 manna herlið saksóknara ekki á Google?

„Sú skýring að sérstakur saksóknari hafi ekki vitað af bræðratengslum Ólafs og Sverris Ólafssona fyrir meðferð málsins stenst ekki. Hver trúir því að 100 manna herlið sérstaks saksóknara kunni ekki á Google þar sem tengslin liggja fyrir? Hvaða hugsanlega ástæðu hafði héraðsdómarinn til þess að ljúga til um samskipti sín við sérstakan saksóknara? Skiptir ekki máli að bréf liggur frammi í málinu frá meðdómaranum sem styður frásögn héraðsdómarans?“, skrifar Jón Ásgeir.

Tilgangurinn að koma mér í fangelsi hvað sem það kostar

„Ég hef mátt verja hendur mínar sem sakborningur síðustu 13 ár. Eitt tekur við af öðru. Tilgangurinn virðist vera sá að koma mér í fangelsi hvað sem það kostar. Gerðar hafa verið ótal húsleitir heima hjá mér og í fyrirtækjum sem tengjast mér. Rótað hefur verið í nærbuxnaskúffu minni, síminn minn hleraður og mikilvægum gögnum haldið undan í dómsmálum. Og ekki hefur eiginkona mín verið látin í friði. Hennar símar hafa verið hleraðir og húsleitir gerðar í hennar fyrirtækjum án þess að hún hafi nokkurn tíma á ævinni fengið stöðu sakbornings. Sök hennar virðist sú ein að hafa gifst röngum manni.

En niðurstaða miðvikudagsins er staðreynd. Enn á ný á að drösla mér niður í héraðsdóm, þar sem ákæruvaldið í landinu fær frjálsar hendur til að færa fram sakargiftir sínar á hendur mér. Ákæruvaldið hefur eytt milljörðum króna af fé íslenskra skattborgara síðustu 13 ár til þess eins að finna einhvern glæp, svo hægt sé að taka mig úr umferð. Ég er viss um að eftir 20 ár munum við fyrirlíta svona vinnubrögð. En af hverju gerist þetta aftur og aftur? Fyrir mér er svarið einfalt - kerfið sér jú um sína - og ver sig með kjafti og klóm.

Verst þykir mér samt að sjá að Hæstiréttur skuli spila með,“ skrifar Jón Ásgeir en eiginkona hans, sem hann vísar til, heitir Ingibjörg Pálmadóttir og er aðaleigandi og stjórnarformaður 365 miðla sem meðal annars gefa út Fréttablaðið.

Sýknudómur yfir fyrrverandi stjórnendum og eigendum Glitnis í Aurum-málinu svonefnda var ómerktur í Hæstarétti þann 22. apríl. Féllst rétturinn á að meðdómandi í Héraðsdómi Reykjavíkur hafi verið vanhæfur vegna tengsla við sakborning í Al Thani-málinu. Málið verður því í aftur tekið fyrir í héraðsdómi.

Jón Ásgeir Jóhannesson, Lárus Welding, Bjarni Jóhannesson og Magnús Arnar Arngrímsson voru á síðasta ári sýknaðir í Héraðsdómi Reykjavíkur í málinu en saksóknari krafðist þess að Hæstiréttur ómerkti dóminn vegna vanhæfis meðdómanda. Meðdómandinn, Sverrir Ólafsson, er bróðir athafnamannsins Ólafs Ólafssonar sem var sakfelldur í Al Thani-málinu í mars.

Í dómi Hæstaréttar kemur fram að ummæli Sverris í fjölmiðlum eftir að dómur héraðsdóms féll gæfu tilefni til að draga með réttu í efa að hann hefði verið óhlutdrægur í garð ákæruvaldsins fyrir uppkvaðningu héraðsdóms. Ummæli Sverris voru eftirfarandi:

„Ég trúi ekki í eina sekúndu að sérstakur saksóknari hafi ekki vitað af mínum tengslum strax í upphafi. Ef hann vissi ekki af mínum tengslum, þá ber það vott um afskaplega léleg og yfirborðskennd vinnubrögð. Mér finnst viðbrögð hans, sko, hæpin og mér finnst þetta bera vott um örvæntingafullar og jafnvel óheiðarlegar aðgerðir. Og hann grípur til þeirra á erfiðum tímum þegar að trúverðugleiki hans stofnunar er eiginlega í molum.“

Í þessu ljósi taldi Hæstiréttur að ómerkja yrði dóm Héraðsdóms Reykjavíkur ásamt meðferð málsins frá upphafi aðalmeðferðar. Vísaði hann því aftur til Héraðsdóms Reykjavíkur til meðferðar.

Ákæra sérstaks saksóknara snýst um félagið Aurum Holdings Limited sem áður hét Goldsmiths, Mappin & Wepp og WOS. Í málinu voru ákærðir þeir Lárus, Jón Ásgeir, Magnús Arnar og Bjarni fyrir umboðssvik eða hlutdeild í umboðssvikum vegna sex milljarða króna lánveitingar Glitnis banka til félagsins FS38 í júlí 2008. Lánið var veitt til að fjármagna að fullu kaup FS38 ehf. á 25,7% hlut Fons hf. í Aurum Holdings Limited.