Mun „kollvarpa“ núverandi kerfi

Bændasamtök Íslands og Landssamband kúabænda telja að breytingar sem Hagfræðistofnun Háskóla Íslands leggur til að verði gerðar á op­in­ber­um stuðningi við mjólkur­fram­leiðslu muni kollvarpa núverandi fyrirkomulagi á framleiðslunni.

Þau gagnrýna jafnframt að skýrsluhöfundar gefi sér að eftirgjöf í tollum á landbúnaðarafurðum skili sér í lægra verði til neytenda. Nýleg dæmi þar sem hið opinbera hefur lækkað álögur á vöruflokkum sýni að það sé ekki gefið að verð á þeim út úr búð lækki samsvarandi.

Þvert á móti komi fram í nýlegum verðlagskönnunum ASÍ að verð á þessum vöruflokkum hækkaði eða stóð í stað eftir að dregið var úr álögum. Aukin skilvirkni í framleiðslu mjólkurafurða hafi aftur á móti skilað sér í lækkuðu verði til neytenda.

Hagfræðistofnun leggur til í skýrslu sinni að tollar á mjólkurafurðum verði lækkaðir, svo að fram­leiðslu grann­land­anna verði sam­keppn­is­fær við ís­lensk­ar mjólkuraf­urðir, og í fram­haldi af því er lagt til að op­in­bert heild­sölu­verð á mjólk­ur­vör­um verði lagt af.

Landssamband kúabænda bendir á að í skýrslunni komi skýrt fram að opinberir styrkir til landbúnaðarframleiðslu hér á landi hafi lækkað sem hlutfall af landsframleiðslu á undanförnum árum. Þrátt fyrir þetta hafi náðst árangur í að ná niður verði á helstu mjólkurvörum og auka framleiðslu.

Frétt mbl.is: Tollar af mjólkurvörum lækki 

• Blogga um frétt