Gelt, gaman og gleði í dagvistun

Það er líf og fjör í dagvistun fyrir hunda í Hundaheimum, en þar geta hundar dvalið meðan eigendurnir eru að heiman. Þegar Morgunblaðið leit inn tóku sex fjörugir hundar á móti blaðamanni og vildu ólmir bregða á leik og sýndu það í verki með því að lauma bolta í lófa hans. Hundunum þarf ekki að leiðast yfir daginn því nægur er félagsskapurinn í dagvistuninni, hvort tveggja af öðrum hundum og umsjónarmönnum þeirra.

„Þetta gengur mjög vel og það hefur verið nóg að gera frá því við opnuðum,“ segir Benedikt Aron Salómeson, eigandi Hundaheima, glaðlega. Dagvistunin á Korputorgi hefur verið starfrækt í rúma þrjá mánuði. Þegar rýmið sem dagvistunin er í losnaði ákvað Benedikt að láta slag standa og opna dagvistun fyrir hunda. Hann hefur lært hundaþjálfun og starfað í mörg ár í gæludýrabransanum. Hann segir hundana einstaklega skemmtileg dýr sem hann hefur yndi af að þjálfa og umgangast.

Ólíkar tegundir

Í Hundaheima geta eigendur komið með hundinn að morgni og náð svo í hann í lok dags. Hundarnir koma fyrst í aðlögun og er algengt að hundurinn dvelji fyrst í um þrjá tíma í fyrsta skipti, en þá fara hundarnir í gegnum mat þar sem könnuð er líðan hundsins og skapferli. Benedikt segir að vel hafi gengið með flestalla hundana en þeir eru þó með ólíka skapgerð og því tekur það hundana mislangan tíma að aðlagast. Fyrst eru þeir látnir hitta einn hund í einu og ef það gengur vel bætist sá næsti við og svo koll af kolli. Einnig er hægt að stúka svæðið af og er það gert þegar margir hundar eru í einu.

Hundarnir eru viðraðir oft á dag svo að þeir geri ekki stykki sín inni. Þá er gengið með þá að minnsta kosti einn kílómetra á dag. Á svæðinu fyrir hundana er nóg af leikföngum, boltar, tuskudýr, hundabæli og margt fleira.

Benedikt vill ekki gera upp á milli hundategunda og segir þær allar skemmtilegar, hverja á sinn hátt. Hann bendir þó á að mikilvægast sé að ala hundinn vel upp frá byrjun og mælir hann með hundanámskeiði fyrir alla hundaeigendur.