Innlent | mbl | 3.7.2015 | 13:43 | Uppfært 14:29

Haftafrumvörpin samþykkt

Bjarni Benediktsson fjármálaráðherra er flutningsmaður frumvarpsins. mbl.is/Golli

Alþingi hefur samþykkt lög um stöðugleikaskatt og nauðasamninga fjármálafyrirtækja, svokölluð haftafrumvörp. „Sögulegur dagur,“ segir forseti þingsins.

Með nýjum lögum um stöðugleikaskatt er lögfestur einskiptis skattur í því markmiði að skapa forsendur fyrir losun þeirra fjármagnshafta sem komið var á hérlendis í kjölfarið á hruni fjármálakerfisins árið 2008.

Frumvörp um stöðugleikaskatt var samþykkt með 55 atkvæðum en einn greiddi ekki atkvæði. Það síðarnefnda var samþykkt með 53 atkvæðum gegn einu. Tveir greiddu ekki atkvæði. Verða bæði málin send ríkisstjórninni sem lög frá Alþingi.

Markmið fyrrgreindra laga er að stuðla að losun fjármagnshafta með efnahagslegan stöðugleika og almannahag að leiðarljósi. Í því skyni er mælt fyrir um skattlagningu sem ætlað er að mæta neikvæðum áhrifum í tengslum við uppgjör eða efndir skattskyldra aðila í kjölfar slitameðferðar þeirra, eins og það er orðað í frumvarpinu.

Einar K. Guðfinnsson, forseti Alþingis, sagði að samþykkt hinna svokölluðu haftafrumvarpa fyrr í dag yrði að teljast í senn mikilvægasta og merkasta löggjöf þessa þings og þótt lengra væri leitað.

„Í þeim skilningi er 3. júlí 2015 augljóslega sögulegur dagur. Það er sérstaklega ánægjulegt að um þessi mál hafi skapast svo víðtæk og góð sátt sem raun ber vitni um. Undirbúningur frumvarpanna var ítarlegur og vandaður, vinnan í þingnefndinni til fyrirmyndar og umræðurnar hér í þinginu almennt málefnalegar og upplýsandi. Segja má að samþykkt laganna í dag marki þáttaskil. Þessi lagasetning er einhver mikilvægasta varðan á leið okkar til framtíðar út úr hinum miklu efnahagsáföllum sem hér dundu yfir. Nú getur þing og þjóð horft til nýrra verkefna á komandi árum,“ sagði forseti Alþingis.

Með efnahagslegan stöðugleika og almannahag að leiðarljósi

„Markmið laganna er að stuðla að losun fjármagnshafta, með efnahagslegan stöðugleika og almannahag að leiðarljósi, með skattlagningu sem ætlað er að mæta neikvæðum áhrifum í tengslum við uppgjör og efndir skattskyldra aðila í kjölfar slitameðferðar þeirra. Eining var um afgreiðslu frumvarpsins á Alþingi og frumvarpið samþykkt samhljóða.

Nýsamþykkt lög fela í sér að lagður verður 39% skattur á fjármálafyrirtæki sem áður störfuðu sem viðskiptabankar eða sparisjóðir en sæta slitameðferð samkvæmt lögum um fjármálafyrirtæki eða hafa lokið henni vegna þess að héraðsdómur hefur úrskurðað að þau skuli tekin til gjaldþrotaskipta. Í þessu felst að hafi þessi fyrirtæki ekki lokið nauðasamningum fyrir næstu áramót mun verða lagður á þau stöðugleikaskattur. Skatturinn verður einnig lagður á fyrirtæki sem áður störfuðu sem viðskiptabankar eða sparisjóðir og lokið hafa slitameðferð en hafa ekki getað efnt skuldbindingar sínar vegna takmarkana á gjaldeyrisviðskiptum og fjármagnshreyfingum milli landa. Skattstofn er heildareignir fyrirtækjanna eins og þær standa 31. desember 2015. Frá reiknuðum skatti er heimilt að draga fyrir fram skilgreindar fjárfestingar skattskyldra aðila í erlendri mynt.

Skatturinn verður einskiptisskattur sem lagður verður á þann 15. apríl 2016 og verða gjalddagar fjórir á árinu: 1. maí, 1. júní, 1. júlí og 1. ágúst 2016.

Frumvarp um stöðugleikaskatt var lagt fram á Alþingi 8. júní sl., eftir að forsætisráðherra og fjármála- og efnahagsráðherra kynntu heildstæða aðgerðaáætlun til losunar fjármagnshafta. Frumvarpið var samið í fjármála- og efnahagsráðuneyti, í samvinnu við forsætisráðuneyti, Seðlabanka Íslands og ríkisskattstjóra,“ segir í tilkynningu frá fjármálaráðuneytinu.