Rafhjólar frá Akureyri til Reykjavíkur

Ómar Ragnarsson ætlar að setja Íslandsmet á morgun þegar hann stefnir á að fara lengstu vegalengd sem rafknúið hjól hefur farið á einni hleðslu. Hann ætlar að fara á hjólinu frá Akureyri til Reykjavíkur. „Ég legg allavega af stað frá Akureyri og fyrsta markmiðið er að setja Íslandsmet í vegalengd sem rafhjól hefur farið á einni hleðslu,“ segir Ómar við mbl.is.

„Síðan er þetta spurning um hvað rafhjól hefur komist lengst í einni ferð á eigin rafmagni, það er markmið númer tvö. Þriðja markmið er að athuga hversu langt maður kemst án þess að skipta um rafgeymi á einum sólarhring. Fjórða markmiðið er að þetta verði fyrsta rafhjólið sem fer milli Akureyrar og Reykjavíkur.“

Ómar segir fimmta markmiðið vera það stærsta. „Það er að sýna fram á að þetta er langódýrasti möguleikinn í orkukostnaði. Við Íslendingar höfum einstæða aðstöðu til að vera í fararbroddi í þessum málum.“

Verkefnið nefnist Orkuskipti en undirbúningur ferðalagsins hefur tekið hálft ár. Hjólað verður á rafknúna reiðhjólinu Sörla sem Gísli Sigurgeirsson rafeindavirki á og hefur útbúið. Ómar fór tilraunaferð í júlí en þá ofhitnaði mótorinn í Bakkaselsbrekku. „Gísli er búinn að setja fleiri gíra á hjólið núna þannig að Bakkaselsbrekkan á að vera leikur einn.“

Ómar segir að væntanlegt afmæli hafi kveikt í honum en hann verður 75 ára í september. „Hvað getur maður gert til að kvitta fyrir að eiga þessi tímamót? Það hefur kveikt í manni smá afl að gefast ekki upp.“

Ómar segist vera örlítið lúnari í dag en þegar hann hjólaði langa vegalengd þegar hann var 15 ára gamall. „Þá setti ég mér það markmið að hjóla 150 kílómetra á sjö og hálfum tíma eftir þjóðvegunum, og tókst það. Sú hjólaferð var mun erfiðari en ég er aumari núna.

• Blogga um frétt