Isavia: Engar breytingar fyrirhugaðar

Isavia hefur ekki í hyggju að gera breytingar á verslunarrými Flugstöðvar Leifs Eiríkssonar á næstunni og engar viðræður eru í gangi við nýja rekstraraðila. Þetta kemur fram í svari Isavia við fyrirspurn mbl.is, en um helgina gaf Eyj­ólf­ur Páls­son, for­stjóri Epal, til kynna að breytinga væri að vænta sem tengdust íslenskri hönnun og sölu slíkrar vöru í flugstöðinni. 

Um áramótin var verslun Epal lokað í flugstöðinni, en hún fékk ekki áfram­hald­andi rekstr­ar­leyfi eft­ir útboðsferli Isa­via á veit­inga- og versl­un­ar­rým­um í flug­stöðinni.

Eyjólfur hafði verið gestur í þættinum Á Sprengisandi á Bylgjunni á sunnudagsmorguninn þar sem hann gaf í skyn að væntinga væri að vænta. Þegar mbl.is leitaði frekari skýringa á þessum orðum hans sagði hann að mjög líklegt væri að breytingar yrðu á ákvörðun Isavia í sambandi við það hversu hátt íslenskum vörum væri gert undir höfði og nefndi hann að engin önnur búð væri betur til þess fallin að sinna slíku verkefni.

Í svari Isavia segir að þótt ekki sé gert ráð fyrir breytingum og engar viðræður séu í gangi, þá hvetji fyrirtækið verslanir í flugstöðinni til að bjóða sem fjölbreyttasta úrval af íslenskri hönnun og mun fagna öllum áformum verslunaraðila um að auka úrval sitt á því sviði.

Þá segir að í þeim breytingum sem er nýlokið við á svæðinu hafi íslenskri hönnun verið gert hátt undir höfði og fjölmargir íslenskir hönnuðir og arkitektar tekið þátt í því ferli.  Til dæmis eru munir frá hundruðum íslenskra hönnuða og handverksfólki til sölu í verslun Rammagerðarinnar og í verslun Airport Fashion er boðið uppá fatnað frá íslenskum fatahönnuðum í miklum mæli, segir í svarinu. 

Frétt mbl.is: Von á breytingum frá Isavia

Eyjólfur Pálsson hefur áhyggjur af framtíð íslenskrar hönnunar í flugstöðinni. mbl.is/Golli

• Blogga um frétt