Innlent | mbl | 7.9.2015 | 12:00 | Uppfært 12:36

Stal upphlut úr Ráðhúsinu

Þjófurinn tók gínuna niður af flygli í salnum og stakk af. Sigurður Bogi Sævarsson

„Það er ekki þannig að einhver nútímakona geti skellt sér í þennan búning, hann er það lítill,“ segir Oddný Kristjánsdóttir, klæðskeri og þjóðbúningasérfræðingur hjá Heimilisiðnaðarfélagi Íslands. Upphlut í eigu félagsins var stolið af sýningu í Ráðhúsi Reykjavíkur um helgina en um töluvert tjón er að ræða fyrir félagið.

Um er að ræða sýningu sem sett var upp í tilefni af því að í ár eru 100 ár liðin frá því að íslenskar konur fengu kosningarétt og átti búningurinn að svipa til þeirra sem konur klæddust um þetta leyti.

Ekki auðvelt að selja búninginn

Sýningin var opnuð á fimmtudaginn og útvegaði Heimilisiðnaðarfélagið tvo búninga; þjóðbúning og upphlut. Búningarnir voru báðir á gínum sem komið var fyrir á flygli í sal í ráðhúsinu.

Þjófurinn tók aðra gínuna niður af flyglinum, fór afsíðis með hana í geymslu sem er staðsett undir kaffihúsi í Ráðhúsinu og klæddi gínuna úr upphlutnum. Því næst gekk hann út með upphlutinn og skildi gínuna eftir í geymslunni.

Margrét Valdimarsdóttir, formaður félagsins, segir að töluvert tjón sé að ræða fyrir félagið. Annars vegar felast nokkur verðmæti í búninginum sjálfum sem hægt hefði verið að selja og þá kosti einnig töluvert að gera annan búning.

Félagið deildi mynd af búningnum á Facebook og er fólk hvatt til að hafa augun opin ef þjófurinn eða aðrir muni hugsanlega bjóða hann til sölu. Margrét bendir á að búningur sem þessi sé ekki auðseljanlegur, þau sem hafi áhuga á þjóðbúningum séu ekki mörg, þjóðbúningaheimurinn sé ekki stór.

„Okkur þykir þetta afskaplega leitt og með algjörum ólíkindum. Það á eftir að vinna úr þessu máli, þetta er í höndum lögreglunnar,“ segir Margrét.

Búningurinn ekki fyrir nútímakonur

Oddný segir að búningurinn sé í stíl áranna 1910 til 1920. Hann er kominn til ára sinna og er ekki mikill glampi af efninu. „Maður vonaði að búningurinn myndi ekki lokka svona mikið,“ segir hún.

Heimilisiðnaðarfélagið á nokkra búninga en flestir þeirra eru í stærðum sem henti nútímafólki Þeir eru þó ekki notaðar við sýningar sem þessar heldur notar félagið litlar, gamlar flíkur sem félagið á, hefur fengið gefins eða keypt í gegnum tíðina.

„Hugmyndin var að velja búning sem sæti vel á þessum litlu gínum. Það er ekki þannig að einhver nútímakona geti smellt sér í þennan búning, hann er það lítill,“ segir Oddný. Pilsið sem fylgir búningnum er líklega hátt í áttatíu ára en upphluturinn er dálítið yngri.