Við ákvörðun mögulegrar refsingar í Marple-málinu ætti að horfa til dómafordæmis þar sem sakfelldir fengu fjögurra og hálfs árs dóm fyrir mun lægri upphæð en um ræðir í þessu máli. Þetta sagði Arnþrúður Þórarinsdóttir, saksóknari, í málflutningi sínum í dag, en þar var vísað til Exeter-málsins svokallaða, þar sem sparisjóðsstjóri og stjórnarformaður Byrs sparisjóðs voru dæmdir fyrir umboðssvik.

Í Marple-málinu eru Hreiðar Már Sigurðsson, fyrrum forstjóri Kaupþings, Guðný Arna Sveinsdóttir, fyrrum fjármálastjóri bankans og Magnús Guðmundsson, fyrrum forstjóri Kaupþings í Lúxemborg, ákærð fyrir fjárdrátt og umboðssvik, eða hlutdeild í slíkum brotum. Auk þess er fjárfestirinn Skúli Þorvaldsson ákærður fyrir hylmingu og peningaþvott.

Fengu 4,5 ár fyrir 1,5 milljarða - Í þessu máli horft til 8 milljarða

Arnþrúður fór yfir dóma sem Hreiðar Már og Magnús höfðu hlotið áður og sagði svo að engin fordæmi væru fyrir brotum af þessari stærðargráðu hér á landi þegar kæmi að umboðssvikum. Í þessu máli er í heild um að ræða um 8 milljarða króna fjármagnsflutninga sem saksóknari og slitabú Kaupþings telja vera ólöglega gjörninga sem hafi skaðað bankann sem því nemur. Í Exeter-málinu var hins vegar um að ræða heimild til 1,5 milljarða útláns sem Hæstiréttur sagði í því máli að sakfelldu í því máli hafi misnotað aðstöðu sína og gengið gegn lánareglum bankans.

Refsiramminn 6 ár

Refsirammi í umboðssvika- og fjárdráttamálum er sex ár, en saksóknari benti dómara á að lagaheimild væri til að auka refsingu umfram refsiramma um 50% ef um síendurtekin brot væri að ræða. Saksóknari í stóra umboðssvikamálinu lagði einnig fram þá kröfu fyrr í ár að sú heimild væri nýtt, en héraðsdómurinn var innan almenna refsirammans.