Forseti fundaði með Stofnun múslima

Forseti Íslands, Ólafur Ragnar Grímsson, átti á mánudaginn fund með stjórnendum Stofnunar múslíma á Íslandi og í Svíþjóð. Sagt er frá fundinum á heimasíðu forsetans, en þar segir að Ólafur Ragnar hafi rætt við Karim Askari og Hussein Aldaoudi, um starfsemi stofnunarinnar á Íslandi, aðlögun að íslensku samfélagi, menningu og lýðræðishefðum, umræður í íslenskum fjölmiðlum sem og um kaupin á Ýmis húsinu og fjárstyrk frá Sádi Arabíu og samskipti þeirra við sendiráð þess lands.

Í nóvember var talsvert í umræðunni að Sádi-Arabía myndi styrkja byggingu mosku hér á landi um 130 milljónir, en sendiherra landsins hafði tilkynnt um það. Tjáði Ólafur Ragnar sig um yfirlýsinguna í samtali við Ríkisútvarpið og sagði tíðindin koma sér á óvart.

„... ég vissi eig­in­lega ekki með hvaða hætti ætti að bregðast við. Þannig að ég varð eig­in­lega bara svo hissa, og svo lamaður, við þessa yf­ir­lýs­ingu, að ég tók bara á móti henni, og sett­ist svo niður og hug­leiddi hana og taldi svo rétt að segja frá henni, eins og ég gerði,“ sagði for­set­inn við Rík­is­út­varpið í nóvember.

Ólafur Ragnar Grímsson, forseti Íslands, ásamt sendiherra Sádi-Arabíu, Ibrahim S.I. Alibrahim. Photo: forseti.is

• Blogga um frétt