Þrír handteknir, tveggja leitað
Setja bókamerki
Um klukkan 13:20 í dag var lögreglu tilkynnt að vopnað bankarán hefði verið framið í útibúi Landsbankans við Borgartún. Tveir menn sem voru vopnaðir skotvopni og hníf höfðu í hótunum og komust á brott með óverulega upphæð reiðufjár. Steinþór Pálsson, bankastjóri Landsbankans, sagði í samtali við mbl.is að starfsfólki og viðskiptavinum bankans sem urðu vitni að ráninu hefði verið verulega brugðið. Starfsfólki var boðin áfallahjálp og útibúinu lokað. Enginn meiddist í ráninu.
Á þriðja tímanum óskaði lögregla eftir upplýsingum um mennina tvo og sendi myndir af þeim úr eftirlitsmyndavél bankans á fjölmiðla. Þar kom fram að mennirnir hefðu flúið útibúið á stolnum sendiferðabíl sem fannst síðan í Barmahlíð. Í tilkynningu lögreglu var fólki bent á að hafa ekki afskipti af mönnunum heldur láta lögreglu vita um ferðir þeirra.
Frá Barmahlíðinni voru spor mannanna tveggja rakin að Öskjuhlíð og rúmlega 16 í dag var greint frá því að vopnuð sérsveit ríkislögreglustjóra hefði hafið leit að mönnunum á svæðinu. Lögregla umkringdi Öskjuhlíðina og þyrla Landhelgisgæslunnar flaug lágt yfir og beindi ljóskösturum niður.
Á sjöunda tímanum bárust fregnir af því að leit í Öskjuhlíð væri hætt. Þær fréttir fengust þó ekki staðfestar af Kristjáni Ólafi Guðnasyni yfirlögregluþjóni, sem fer með rannsókn málsins. Hann staðfesti þó að tveir hefðu verið handteknir í tengslum við rannsókn málsins en tveggja væri enn leitað.
Í tilkynningu sem barst frá Kristjáni rétt fyrir klukkan hálftíu í kvöld var staðfest að tveir menn hefðu verið handteknir í heimahúsi í Reykjavík um klukkan sjö og sá þriðji um áttaleytið. Samkvæmt tilkynningunni er tveggja manna þó enn leitað í tengslum við rannsókn málsins og óskaði lögregla eftir að komast í samband við þá, en þeir eru taldir geta veitt upplýsingar um málið.
Þar kom einnig fram að meint vopn sem notuð voru í ráninu hefðu fundist. Þau voru eftirlíking af skammbyssu og hnífur. Ekki er von á frekari upplýsingum í kvöld.
„Það er stutt á milli stórra atburða“
Segja KÍ hafa leitt skólakerfið í öngstræti
Brotin eftir greiningarferlið
Einsdæmi að ekki séu samræmd próf
Mega gefa einkunnir í tölum, bókstöfum og litum
Óráðleg og afdrifarík ákvörðun skólayfirvalda
Hver var hvati Crooks?