Vopnuð sérsveit embættis ríkislögreglustjóra hefur hafið leit í Öskjuhlíð að mönnunum tveimur sem frömdu vopnað rán í útibúi Landsbankans við Borgartún fyrr í dag.

Lögregla hefur umkringt Öskjuhlíð og hafið sporrakningu á svæðinu. Samkvæmt heimildum mbl.is eru mennirnir taldir hættulegir og vopnaðir þar til annað reynist sannara. 

Fréttin verður uppfærð.

UPPFÆRT 16:41

Að sögn íbúa í Hlíðunum flýgur þyrla Landhelgisgæslunnar nú lágflug yfir Öskjuhlíð. Samkvæmt upplýsingum frá Landhelgisgæslunni er þyrlan í lofti við að aðstoða lögreglu í ákveðnu máli. Ekki fékkst staðfest að um þetta ákveðna mál í Öskjuhlíð væri að ræða.

UPPFÆRT 16:51

Þyrla Landhelgisgæslunnar fer á milli Öskjuhlíðar og íbúðarhúsa í Hlíðunum sunnan megin Miklubrautar og beinir ljóskösturum niður. Óstaðfestar heimildir herma að þyrlan noti hitamyndavélar og nætursjónauka við leitina í Öskjuhlíð.