Íslendingur fær ekki að gleymast hjá Google

Íslenskur einstaklingur sem hafði fengið skilorðsbundna fangelsisrefsingu fyrir fjármunabrot í starfi fær ekki að fjarlægja niðurstöður leitarvélarinnar Google sem vísa í fréttir um umrætt brot. Þetta kemur fram í úrskurði Persónuverndar, en maðurinn kvartaði yfir því að Google hafi neitað að fjarlægja niðurstöðurnar úr leitarvél sinni.

Skoðaði Persónuvernd málið meðal annars út frá tjáningarfrelsisákvæðis stjórnarskrárinnar og mannréttindasáttmála Evrópu á móti réttinum til friðhelgis einkalífs í sömu sáttmálum.

„Tekið er fram að Persónuvernd hafi ekki talið sig bæra til að taka ákvörðun um hvort tjáning hafi falið í sér misnotkun á réttinum til tjáningarfrelsis heldur heyri slíkt undir dómstóla. Hér reyni hins vegar ekki á hvort um hafi verið að ræða slíka tjáningu heldur hvort fréttaumfjöllun megi vera aðgengileg í niðurstöðu leitar á vefleitarvél. Telji Persónuvernd, í ljósi atvika í málinu og með hliðsjón af stjórnarskránni og mannréttindasáttmálanum, ekki hafa komið fram að samkvæmt lögum nr. 77/2000 hafi verið óheimilt að veita slíkt aðgengi að umræddri niðurstöðu leitar,“ segir í tilkynningu Persónuverndar.

Með vísan í ofangreint segir í úrskurðarorðinu að Google sé heimilt að veita aðgengi um vefleitarvél sína að niðurstöðu leitar um fjölmiðlaumfjöllun um umræddan dóm.

• Blogga um frétt