Innlent | mbl | 4.2.2016 | 15:54

Heildardómur fyrir markaðsmisnotkunarmálin 5 ár

Sigurjón Þ. Árnason, fyrrverandi bankastjóri Landsbankans. mbl.is/Þórður

Heildardómur yfir Sigurjóni Árnasyni, fyrrum bankastjóra Landsbankans, í báðum markaðsmisnotkunarmálunum sem dæmt hefur verið í í Hæstarétti nemur samtals 5 ára fangelsi. Þetta var staðfest í Hæstarétti í dag, en þá var 12 mánaða fangelsisdómur héraðsdóms í markaðsmisnotkunarmáli bankans þyngdur í 18 mánuði. Þessi hluti málsins er svokallaður kauphluti málins, en í söluhlutanum, svokölluðu Ímon-máli, hafði Sigurjón áður fengið þriggja og hálfs árs dóm.

Saksóknari setti málin upphaflega fram sem eitt mál, markaðsmisnotkunarmál, en það sama var upp á teningnum varðandi markaðsmisnotkunarmál Kaupþings. Héraðsdómur ákvað aftur á móti að skipta málinu upp í sölu- og kauphluta í Landsbankamálinu á meðan Kaupþingsmálið var rekið áfram sem eitt mál.

Úr varð að söluhlutinn – Ímon-málið, var rekinn sérstaklega fyrir dómstólum og fékkst niðurstaða Hæstaréttar í því máli í október á síðasta ári. Auk Sigurjóns voru þau Sigríður Elín Sigfúsdóttir, fyrrverandi framkvæmdastjóri fyrirtækjasviðs bankans og Steinþór Gunnarsson fyrrverandi forstöðumaður verðbréfamiðlunar Landsbankans dæmd sek í málinu.

Í dag á kauphlið málsins voru ásamt Sigurjóni þrír fyrrum samstarfsmenn hans dæmdir sekir. Ívar Guðjónsson fyrrum forstöðumaður eigin fjárfestinga bankans var dæmdur í 2 ára fangelsi og Júlíus S. Heiðarsson, fyrrum starfsmaður eigin fjárfestinga fékk 1 árs fangelsi og Sindri Sveinsson, fyrrum starfsmaður eigin fjárfestinga bankans fékk níu mánaða dóm. Allir dómarnir voru óskilorðsbundnir.