Hægt að frysta burt fituna

Nú er komin til sögunnar ný tækni þar sem fitufrumum er eytt á náttúrulegan hátt og er aðgerðin hættulítil og árangurinn varanlegur. Dr. Bolli Bjarnason, húð- og kynsjúkdómalæknir hjá Útlitslækningu, segir að kælifitueyðing sé viðurkennd í læknasamfélaginu en hann er eini læknirinn á Íslandi sem beitir henni.

Kælifitueyðing, stundum kölluð fitufrysting, byggist á kælingu fitufrumna niður í -5°C til +5°C en fitufrumurnar þola illa þetta hitastig og eru álitnar eyðast á náttúrulegan hátt. Meðferðin er einnig gerð á nokkrum snyrtistofum en engar reglur eru hérlendis um hver má framkvæma slíkar aðgerðir.

Virkar best á kvið, mjöðmum og lærum

Oft er erfitt að ná af sér fitu sem virðist svo föst að hún bifast ekki þrátt fyrir líkamsrækt og hollar matarvenjur. Meðferðin er ekki hugsuð sem megrun og er ekki fyrir fólk í yfirþyngd heldur frekar til að ná fitu af erfiðum svæðum, minnka eða eyða fellingunum og endurmóta þannig líkamslínurnar. 

Bolli segir að hægt sé að beita kælifitueyðingu hvar sem er á líkamanum fyrir utan í andliti. „Mér finnst hún koma að mestu gagni gegn fitufellingum, sérlega á kvið, mjöðmum og lærum sem hafa til hneigingu til að haldast þrátt fyrir kjörþyngd,“ segir hann.

Árangur eftir 4-6 mánuði

Bolli framkvæmir aðgerðina með sérstökum frostverndandi himnum sem er komið fyrir á húðinni yfir þeim fitufellingum sem á að meðhöndla. Þar næst eru meðferðarhausar settir yfir fellingarnar og létt sog sett á sem sýgur fellingarnar þétt inn í hausana. Í hausunum eru kæliplötur sem kæla húðina á meðan himnurnar vinna gegn því húðin sjálf frjósi. Yfirleitt eru tvö svæði meðhöndluð samtímis og tekur meðferðin um klukkustund í hvert skipti. Bolli segir að árangurinn sé ekki sýnilegur strax en kemur hægt og rólega á 4-6 mánuðum. „Stundum þarf að koma í nokkur skipti en það er metið í hverju og einu tilfelli og er árangurinn endanlegur eða mjög varanlegur,“ segir hann. Rannsóknir staðfesta að kælifitueyðing virkar vel að sögn Bolla. „Rannsókn byggð á ómun sýndi að 25,5% af fitunni höfðu horfið 6 mánuðum eftir meðferð. Það er með þessa meðferð sem margar aðrar að fólk svarar mismunandi vel, sumir mjög vel og aðrir minna eða ekkert.“

Segir lækni þurfa að vera til staðar

Bolla finnst óeðlilegt að aðgerðin sé framkvæmd utan lækningasviðs. „Reynsla skiptir miklu máli og nauðsynlegt að til taks sé læknir sem þekkir mögulegar aukaverkanir og kann að bregðast við þeim því sumar krefjast skyndimeðferðar eða ávísunar lyfja,“ segir Bolli.

„Versta aukaverkunin finnst mér vera kal sem jafngildir 2° bruna. Kal getur orðið sé ekki nægjanleg reynsla til staðar til að meta ástand húðarinnar meðan á meðferð stendur, sérstaklega varðandi kuldastig. Með nærgætni hef ég blessunarlega verið laus við aukaverkanir. Ég hef hins vegar fengið til mín fólk með aukaverkanir eftir kælifitueyðingu sem framkvæmd hefur verið utan lækningasviðs,“ segir Bolli. „Í Bandaríkjunum banna fylkislög sölu búnaðar til kælifitueyðingar til annarra en lækna. Í Danmörku er almennum læknum ekki heimiluð fitueyðing heldur krefst hún sérfræðimenntunar í húð- og kynsjúkdómum eða lýtaskurðlækningum,“ segir Bolli að lokum.

Nánar má lesa um málið í Sunnudagsblaði Morgunblaðsin.