Háskóli Íslands á meðal 200 bestu

Háskóli Íslands er í 138. sæti yfir bestu háskóla Evrópu samkvæmt lista sem breska tímaritið Times Higher Education hefur birt.

Bretar eiga þrjá efstu háskólana á listanum og alls sjö á topp tíu.

Í efsta sæti er háskólinn í Oxford, í öðru sæti er háskólinn í Cambridge og í því þriðja er Imperial College of London. Samanlagt eiga Bretar langflesta skóla á listanum, eða 46 af 200.

Háskólinn í Oxford er sá besti í Evrópu, samkvæmt listanum. mbl.is/Ómar

Einn háskóli frá Norðurlöndunum kemst á topp tíu listann, eða Karolinska Institute í Svíþjóð, sem nær 9. sæti.

Times Higher Education segir þetta eina listann sem mæli allt það mikilvægasta sem nútímalegur og alþjóðlegur háskóli þarf að hafa upp á að bjóða: rannsóknir, kennslu, miðlun þekkingar og alþjóðlega virkni.

Næstu háskólar frá Norðurlöndunum á listanum á eftir Karolinska Institute eru háskólinn í Helskinki sem er í 28. sæti, Uppsalaháskóli í Svíþjóð í 32. sæti og háskólinn í Kaupmannahöfn sem er í sætinu fyrir neðan.

Háskólinn í Lundi í Svíþjóð er í 37. sæti. mynd/Wikipedia

Þá er háskólinn í Lundi í Svíþjóð í 37. sæti og háskólinn í Árhúsum í Danmörku í 46. sæti.  

Þrír háskólar frá Noregi komast á listann. Háskólinn í Ósló er þar efstur í 63. sæti.

• Blogga um frétt