Þang og þari sem vex í Breiðafirði er vannýtt auðlind að mati Einars Sveins Ólafssonar, framkvæmdastjóra Kalkþörungaverksmiðjunnar á Bíldudal og talsmanns Marigot sem stendur ásamt Matís að væntanlegri þörungaverksmiðju í Stykkishólmi.
Hann segir að þær rannsóknir sem gerðar hafi verið sýni að vöxtur þangs og þara sé margfaldur á við það sem Þörungaverksmiðjan á Reykhólum nýtir til framleiðslu.
Írska fyrirtækið Marigot og Matís standa að væntanlegri verksmiðju Deltagen í Stykkishólmi. Einar Sveinn segir að starfsmaður taki til starfa í Reykjavík um næstu mánaðamót til að vinna að áframhaldandi rannsóknum og þróun framleiðslunnar. Innan tveggja mánaða sé ætlunin að setja upp tilraunaverksmiðju í bráðabirgðahúsnæði í Stykkishólmi, að því er fram kemur í umfjöllun um mál þetta í Morgunblaðinu í dag.