Mývetningar flokka rusl

Mývetningar ætla að koma sér upp flokkunarsvæði í landi Grímsstaða til að geta flokkað rusl. Ekki fékkst leyfi frá landeigendum í Reykjahlíð og því var samþykkt að ganga til samninga við bændur á Grímsstöðum.

Breyta þarf aðalskipulagi og skilgreina lóðina því landið var ekki skipulagt sem slíkt. „Það er komið að því að flokka hér í Mývatnssveit eftir áralanga bið,“ segir Jón Óskar Pétursson, sveitarstjóri Skútustaðahrepps, í Morgunblaðinu í dag. „Við erum búin að vera í umbreytingum á þessu undanfarin tvö ár.

Þetta kemst vonandi í gagnið í júní fyrir heimilin hér í sveitinni. Þá fá allir íbúar sína tunnu og fara að flokka,“ segir Jón.