DV biðst afsökunar vegna Hlíðamálsins

Afsökunarbeiðni vegna Hlíðamálsins svokallaða var í kvöld birt á fréttavef DV.is.  Þar segir að blaðið og fyrrverandi blaðamaður DV biðjist afsökunar á því sem ofsagt sé í þremur fréttum af Hlíðamálinu, sem birtar voru 9. nóvember í fyrra.

Þann dag birti Fréttablaðið á forsíðu frétt um meinta nauðgun og hrottaleg kynferðisbrot tveggja manna og fjallað var um málið, meinta gerendur og viðbrögð á samfélagsmiðlum á vef DV.is.

Vilhjálmur H. Vilhjálmsson, lögmaður manna tveggja sem kærðir voru fyrir nauðgun í Hlíðarmálinu er sáttur við afsökunarbeiðnina. „Það er ánægjulegt þegar blaðamenn og netmiðlar sjái að sér og biðjist afsökunar á því þegar þeir hafa beitt menn rangindum. Þeir eru menn að meiru fyrir vikið og mættu fleiri fylgja þeirra fordæmi,“ sagði Vilhjálmur.

Vilhjálmur segir ekki fleiri afsökunarbeiðnir hafa borist frá fjölmiðlum að svo stöddu. Afstaða miðla 365 liggi fyrir og Hringbraut hafi fengið frest til að skoða málið ásamt lögfræðingi miðilsins.

Afsökunarbeiðnin sem birt er á DV.is er svohljóðandi: 

„Jóhann Skúli Björnsson fyrrv. blaðamaður og DV biðjast afsökunar á því sem ofsagt var í þremur fréttum www.dv.is af svokölluðum Hlíðamálum, 9. nóvember 2015.

Málsaðilar hafa náð fullum sáttum. Efni sáttarinnar er trúnaðarmál.“

Vilhjálmur hefur sent úr 22 kröfubréf vegna Hlíðamálsins, þar sem fólk er krafið um afsökunarbeiðni og miskabætur vegna ummæla sinna. Þá hefur hann sent tvær kærur. 

Tveir þeirra sem fengu kröfu­bréf vegna um­mæla sinna í kjöl­far frétta um Hlíðamálið svo­kallaða hafa hafnað kröf­un­um sem þar eru gerðar. Nokkr­ir sem fengu bréf hafa beðist af­sök­un­ar á um­mæl­um sín­um en aðrir hafa beðið um frest til að skoða málið bet­ur. 

Tveir hafna kröfum mannanna

• Blogga um frétt