Innlent | Morgunblaðið | 15.6.2016 | 5:30 | Uppfært 7:28

Handteknir vegna Guðmundar

Guðmundar og Geirfinnsmálið var víðfeðmt á sínum tíma. Málið er nú á borði endurupptökunefndar.

Tveir menn voru handteknir í gærmorgun í tengslum við rannsókn setts saksóknara á morði Guðmundar Einarssonar í Guðmundar- og Geirfinnsmálinu.

Samkvæmt áreiðanlegum heimildum Morgunblaðsins hefur embætti setts saksóknara yfir málinu undir höndum nýjan vitnisburð í tengslum við málið og var hann talinn gefa tilefni til að handtaka mennina tvo.

Vegna rannsóknarhagsmuna voru mennirnir handteknir og yfirheyrðir hvor í sínu lagi, til að koma í veg fyrir að þeir gætu samhæft vitnisburði sína. Mennirnir voru látnir lausir að yfirheyrslum loknum. Þeir hafa báðir komið við sögu lögreglu áður og afplánað refsidóma.

Frétt mbl.is: Falskar játningar mun algengari en talið var

Samkvæmt lögum um meðferð sakamála hefur lögreglan heimild til að handtaka mann ef rökstuddur grunur leikur á að hann hafi framið brot sem sætt getur ákæru, enda sé handtaka nauðsynleg til að koma í veg fyrir áframhaldandi brot, til að tryggja návist viðkomandi eða öryggi hans eða annarra eða til að koma í veg fyrir að sá sem í hlut á spilli sönnunargögnum.

Davíð Þór Björgvinsson, settur saksóknari endurupptöku Guðmundar og Geirfinnsmálsins, og Friðrik Smári Björgvinsson, yfirmaður rannsóknardeildar lögreglunnar, vildu ekki tjá sig um málið þegar eftir því var leitað.

Forsíða Morgunblaðsins daginn eftir að dómur hafði verið kveðinn upp í Guðmundar- og Geirfinnsmálum þann 27. desember 1977. mbl.is

Guðmundur sást síðast 1974

Morðið á Guðmundi Einarssyni er hluti af hinu víðfema Guðmundar og Geirfinnsmáli. Tilkynnt var um hvarf Guðmundar hinn 29. janúar árið 1974. Lögreglan lýsti eftir Guðmundi í fjölmiðlum og hóf leit ásamt Slysavarnarfélagi Íslands. Leit skilaði engum árangri. Síðast sást til Geirfinns hinn 19. nóvember árið 1974, en hann hafið mælt sér mót við óþekktan mann í Keflavík. Hópur ungmenna var síðar fundinn sekur um morðin á Guðmundi Einarssyni og Geirfinni Einarssyni.

Málið er nú á borði endurupptökunefndar eftir að endurupptökubeiðni var lögð fram í kjölfar skýrslu nefndar sem innanríkisráðherra skipaði til að fara yfir rannsókn og málsmeðferð Guðmundar- og Geirfinnsmálsins.