Senda á flotbrúðu undir ísdyngjuna sem liggur yfir ána í Sveinsgili, til að sjá hvar hún stoppar, samkvæmt upplýsingum frá svæðismiðstöð björgunarsveita á Hellu. Ekkert hefur enn sést til franska ferðamannsins sem rann ofan í ána og undir ísdyngjuna í gærkvöldi.

Von er á liðsafla frá björgunarsveitum á höfuðborgarsvæðinu nú eftir hádegi, en um 30 manns hafa unnið akkorðsvinnu á vöktum við að moka snjó úr dyngjunni frá því þrjú í nótt, er aðrir þeirra 180 björgunarsveitarmanna sem tekið hafa þátt í aðgerðunum héldu heim í hvíld undir morgun. Baldur Ólafsson, sem er í svæðisstjórn Landsbjargar á Hellu, segir mennina vera orðna úrvinda.

„Við erum að fá á svæðið um 30 manns af höfuðborgarsvæðinu, sem eru þegar lagðir af stað og þeir verða komnir upp eftir um tvöleytið. Fleiri björgunarsveitarmenn eru svo væntanlegir seinna í dag. Þá verður þyrla Landhelgisgæslunnar væntanlega einnig komin í loftið, en hún mun selflytja menn á staðinn.“

Hann segir sprengjusveitina koma aftur á vettvang með þyrlunni og þá muni kafararnir einnig koma til baka á sama tíma.

„Við erum síðan að fara með flotbrúðu sem verður látin fljóta þarna í gegn til að sjá hvar hún stoppar.“

Baldur segir þá björgunarsveitarmenn sem fyrst voru kallaðir út í gær hafa verið komna til byggða í hvíld um fimmleytið í morgun. „Þeir verða kallaðir aftur út um hádegið, en þessir þrjátíu sem nú eru á staðnum eru bara í mokstri á meðan hinir eru í hvíld.“

Björgunarsveitarmennirnir eru enn að vinna í þriðju holunni, en búið er að gera tvær holur sem ná í gegnum ísdyngjuna niður að ánni. „Þeir eru að vinna á ísnum með bensínkeðjusögum, járnkörlum og skóflum. Þetta gengur hægt, en gengur samt þrátt fyrir að vera mikil erfiðisvinna. Við höldum áfram öllu eins og við mögulega getum.“

Tengdar fréttir

Leit við Sveinsgil

Eins og að hafa orðið fyrir lest

• Fékk hjartaáfall á vettvangi
• Tók hálftíma að ná í manninn
• Franski ferðamaðurinn látinn
• Leita fram eftir kvöldi

» Fleiri tengdar fréttir

• Blogga um frétt