Í vanda staddar á Fimmvörðuhálsi

Björgunarsveitir á Suðurlandi voru kallaðar út síðdegis til aðstoðar göngukonu sem slasaðist illa á ökkla eftir að afa hrasað á Heljarkambi á gönguleiðinni yfir Fimmvörðuháls. Björgunarsveitarfólk lagði upp bæði frá Skógum og Básum í Goðalandi.

Þyrla Landhelgisgæslunnar var kölluð til aðstoðar þegar ljóst var að konan var ófær til gangs því á þessum slóðum er afar erfitt að ganga með sjúkling í börum, að því er kemur fram í tilkynningu frá Slysavarnarfélaginu Landsbjörgu.

Vegna þoku þurfti þyrlan að lenda nokkuð neðan við slysstaðinn. Þaðan fór læknir á vettvang þar sem búið var um konuna. Þegar þokunni létti skömmu síðar tók þyrlan á loft, konan var hífð um borð og flogið var með hana á sjúkrahús í Reykjavík.

Við björgunaraðgerðina rákust björgunarmenn á aðra göngukonu sem hafði ofkælst á Fimmvörðuhálsi. Þeir veittu henni aðhlynningu og hjálpuðu henni niður að Skógum þaðan sem hún var flutt á brott í sjúkrabíl til frekari aðhlynningar.

• Blogga um frétt