Innlent | mbl | 27.9.2016 | 13:34 | Uppfært 28.9.2016 11:21

Stefndi fé bankans í verulega hættu

Hreiðar Már Sigurðsson, fyrrverandi forstjóri Kaupþings. mbl.is/Árni Sæberg

Hreiðar Már Sigurðsson, fyrrverandi forstjóri Kaupþings, er sakaður um að hafa misnotað aðstöðu sína og stefnt fé bankans í verulega hættu þegar hann lét bankann veita einkahlutafélaginu Hreiðar Már Sigurðsson 574 milljóna króna eingreiðslulán í ágúst 2008.

Þetta kemur fram í ákæru héraðssaksóknara á hendur Hreiðari Má, sem mbl.is hefur undir höndum.

Frétt mbl.is: Hreiðar ákærður fyrir innherjasvik

Hann hefur verið ákærður fyrir umboðssvik og innherjasvik. Guðný Arna Sveinsdóttir, fyrrverandi fjármálastjóri Kaupþings, hefur verið ákærð fyrir hlutdeild í umboðssvikum með því að hafa veitt liðsinni í verki við að koma þeim fram. Einkum með fyrirmælum og samskiptum við lægra setta starfsmenn bankans síðari hluta ágústmánaðar 2008.

Lánið ekki veitt með samþykki stjórnar og án fullnægjandi trygginga

Fram kemur í ákærunni, að eingreiðslulánið sem Kaupþing veitti einkahlutafélaginu, sem var í eigu og laut stjórn Hreiðars Más, hafi verið gert án þess að fyrir lægi samþykki stjórnar bankans fyrir láninu og án fullnægjandi trygginga fyrir endurgreiðslu lánsins. Einkum þar sem einu tryggingarnar að baki láninu, allir hlutir einkahlutafélagsins í Kaupþingi banka, stóðu einnig sem veð fyrir öllum öðrum og eldri skuldum félagsins við bankann og veittu ekki nægilegt veðrými til hinnar nýju lánveitingar samkvæmt reglubók bankans og samningi um lánveitinguna þann 11. ágúst 2008.

Ennfremur segir, að Hreiðar Már hafi vitað, eða hlaut að vita, að fyrrgreindir hlutir í Kaupþingi gátu á þessum tíma ekki talist fullnægjandi sem einu tryggingarnar fyrir láninu.

324 milljóna kr. mismunur

Tekið er fram, að láninu hafi verið ráðstafað til að fjármagna að fullu kaup einkahlutafélagsins af Hreiðari á 812.000 hlutum í bankanum 6. ágúst 2008 fyrir 704 kr. á hlut, eða fyrir samtals 571.648.000 kr. Þá sömu hluti keypti Hreiðar sama dag í eigin nafni samkvæmt kauprétti fyrir 303 kr. á hlut, eða fyrir samtals 246.036.000 kr.

Greiðsla að fjárhæð 324.000.000 kr, eða sem nam um það bil mismun á síðastgreindum tveimur fjárhæðum, rann þann 19. ágúst 2008 af bankareikningi sem var tengdur vörslusafni Hreiðars hjá Kaupþingi, inn á bankareikning hans hjá sama banka og stóð Hreiðari eftir það til frjálsrar ráðstöfunar.

Eftirstöðvarnar að fullu glataðar

Þá segir, að lánið hafi verið á gjalddaga 11. ágúst 2011. Einkahlutafélagið var tekið til gjaldþrotaskipta 13. apríl sama ár. Arion banki, sem þá var orðinn kröfuhafi lánsins. lýsti kröfu við búskiptin að fjárhæð 819 milljónir kr. með áföllnum vöxtum og kostnaði. Upp í kröfuna greiddust 1.612.170kr. við úthlutun úr búi einkahlutafélagsins. Lauk skiptum í janúar 2014 og var einkahlutafélagið afskráð í lok mánaðarins. Héraðssaksóknari segir að eftirstöðvar lánsins megi því telja að fullu glataðar.

Guðný Arna Sveinsdóttir, fyrrum fjármálastjóri Kaupþings. mbl.is/Árni Sæberg

Héraðssaksóknari segir að Guðný Árna, sem er ákærð fyrir hlutdeild í umboðssvikunum, hafi vitað, eða gat ekki dulist, að tryggingar fyrir lánveitingunni til félagsins hefðu verið ófullnægjandi og hafði meðal annars upplýsingar um að tryggingastaða þess gagnvart bankanum vega fyrri lánveitinga bankans til þessa væri þá þegar ófullnægjandi og að frekari tryggingar teldust vanta fyrir skuldum þess við bankann.

Hún er einnig sökuð um að hafa gefið fyrirmæli um útgreiðslu á lánsfjárhæðinni að frádregnum kostnaði til félagsins 21. ágúst 2008 en það var áður en samningur vegna lánsins hafði verið frágenginn og undirritaður.

Gat ekki dulist að lánveitingin væri óheimil

„Í ljósi allra aðstæðna og atvika gat ákærðu ekki dulist að lánveitingunni til einkahlutafélagsins væri óheimil og til þess fallin að valda bankanum verulegri fjártjónshættu,“ segir í ákærunni.

Þá er Hreiðar Már ákærður fyrir innherjasvik með því að hafa 6. ágúst 2008 selt 812.000 hluti í Kaupþingi sem hann keypti í eigin nafni sama dag, til einkahlutafélagsins Hreiðar Már Sigurðsson, sem var í hans eigu sem fyrr segir. Voru hlutirnir seldir á 571.648.000 kr. þrátt fyrir að hafa þá búið yfir innherjaupplýsingum um Kaupþing sem Hreiðar varð áskynja um í starfi sínu sem forstjóri. Það laut að því að skráð markaðsverð hlutabréfa í bankanum gaf á þessum tíma ranga mynd af verðmæti þeirra og hærri en efni stóðu til, vegna langvarandi og stórfelldrar markaðsmisnotkunar með hlutabréf í bankanum sem þá hafði staðið fyrir að minnsta kosti frá nóvember 2007 og Hreiðar hafi sjálfur átt þátt í.

Málið verður þingfest í Héraðsdómi Reykjavíkur 3. október.