Innlent | mbl | 4.10.2016 | 18:57 | Uppfært 19:13

Segir óvissu ríkja á Alþingi

Alþingi Íslands. Þingfundur verður klukkan 10.30 í fyrramálið. mbl.is/Ómar

Einar K. Guðfinnsson, forseti Alþingis, gerir ekki ráð fyrir að niðurstaða náist í kvöld í neinum þeirra mála sem voru rædd á Alþingi í dag. Hann segir að þingið sé í óvissu.

Einar sleit þingfundi klukkan 18 en þá hafði fundi ítrekað verið frestað. Í ljósi stöðunnar segist hann hafa ákveðið að boða til þingfundar klukkan 10.30 í fyrramálið. Engir fundir eru fyrirhugaðir fyrir þann tíma.

Alls eru 16 mál á lista ríkisstjórnarinnar, samkvæmt því sem Sigurður Ingi Jóhannsson forsætisráðherra greindi frá á Alþingi.

Á meðal þeirra mála sem voru á dagskrá ríkisstjórnarinnar í dag voru staða lífeyrismála opinberra starfsmanna, tilnefning Vatnajökulsþjóðgarðs í heimsminjaskrá UNESCO, fagháskólanám á Íslandi og skammtímaáætlun um uppbyggingu innviða til verndar náttúru- og menningarsögulegum minjum á ferðamannastöðum.