Ellefu nautgripir drápust í stórbruna á bænum Fögruhlíð í Jökulsárhlíð skammt frá Hellisheiði eystri sem liggur til Vopnafjarðar.
Fjárhús og gripahús sem hýsti gripina brann allt til kaldra kola á augabragði. Slökkviliðið er enn að störfum á svæðinu.
Uppfært: 16.10
„Þetta gerðist mjög hratt því bóndinn á bænum var á næsta bæ og sá reykinn stiga upp. Þegar þeir koma hingað heim er fjárhúsið alelda og ekkert hægt að bjarga neinu og allt er í svartareyk. Eftir 20 mínútur voru fjárhúsin fallin,“ segir Baldur Pálsson, slökkviliðsstjóri hjá Brunavörnum á Austurlandi.
Slökkvistarfið beindist að því að slökkva í glæðum og verja stæður af heyi sem stóðu nálægt útihúsunum.
Engin hætta var á að eldurinn færi í íbúðarhús.
Ekkert fé var í fjárhúsunum sem rúmar 530 kindur. Féð var allt úti en veðrið hefur verið gott undanfarið.
Húsin voru stálgrindarhús og mikið endurnýjuð.